1 ⲛϩⲣⲏⲓ ⲇⲉ ϧⲉⲛϯⲙⲁϩⲅ ⲛⲣⲟⲙⲡⲓ ⲛⲧⲉⲕⲩⲣⲟⲥ ⲡⲓⲡⲉⲣⲥⲓⲥ ⲫⲏⲉⲧⲁϥϭⲓ ⲛϯⲙⲉⲧⲟⲩⲣⲟ ⲛⲧⲉⲃⲁⲃⲩⲗⲱⲛ ⲁⲩϭⲱⲣⲡ ⲛⲟⲩⲥⲁϫⲓ ⲉⲃⲟⲗ ⲛⲇⲁⲛⲓⲏⲗ ⲫⲏⲉⲧⲉ ⲡⲉϥⲣⲁⲛ ⲡⲉ ⲃⲁⲗⲇⲁⲥⲁⲣ ⲟⲩⲙⲏⲓ ⲡⲉ ⲡⲓⲥⲁϫⲓ .
…
2 ⲁⲛⲟⲕ ⲇⲁⲛⲓⲏⲗ ⲛⲁⲓⲉⲣⲛⲏⲥⲧⲉⲩⲓⲛ ⲛⲕⲁ ⲛⲉϩⲟⲟⲩ ϣⲁⲣⲟⲩϩⲓ ⲙⲙⲏⲛⲓ ⲙⲡⲓⲟⲩⲱⲙ ⲛⲟⲩⲁϥ ⲟⲩⲇⲉ ⲙⲡⲓⲥⲱ ⲛⲟⲩ ⲏⲣⲡ ⲙⲡⲓⲑⲱϩⲥ ⲙⲙⲟⲓ ⲛⲟⲩⲛⲉϩ .
…
3 ⲁⲥϣⲱⲡⲓ ⲙⲙⲟⲓ ⲉⲓⲟϩⲓ ⲉⲣⲁⲧⲉϫⲉⲛⲫⲓⲁⲣⲟ ⲡⲓⲧⲓⲅⲣⲟⲥ ⲁ ⲟⲩϩⲱⲃ ϭⲱⲣⲡ ⲛⲏⲓ ⲉⲃⲟⲗ .
…
4 ⲛⲁⲓⲛⲁⲩ ϩⲏⲡⲡⲉ ⲓⲥ ⲡⲓϥⲧⲟⲩ ⲑⲏⲟⲩ ⲛⲧⲉⲧⲫⲉ ⲛⲁⲩϩⲓⲟⲩⲓ ⲉϧⲣⲏⲓ ⲉⲫⲓⲟⲙ ⲛⲛⲓϣϯ .
…
5 ⲁⲓⲛⲁⲩ ⲉⲇ ⲛⲑⲏⲣⲓⲟⲛ ⲁⲩⲓ ⲉϩⲣⲏⲓ ϧⲉⲛⲫⲓⲁⲣⲟ ⲉⲩⲟⲓ ⲛϩⲟϯ ⲉⲙⲁϣⲱ .
…
6 ⲡⲓϩⲟⲩⲓⲧ ⲛⲑⲏⲣⲓⲟⲛ ⲉϥⲟⲛⲓ ⲛⲟⲩⲗⲁⲃⲟⲓ ⲉⲣⲉⲟⲩⲟⲛ ϩⲁⲛⲧⲁⲡ ⲉⲣⲟϥ ⲙⲫⲣⲏϯ ⲛⲟⲩⲁⲏⲧⲟⲥ ⲛⲁⲓⲛⲁⲩ ⲡⲉ ϣⲁⲛⲧⲟⲩϧⲱⲗ ⲛⲛⲉϥⲧⲉⲛϩ ⲟⲩⲟϩ ⲁⲩϯ ⲛⲁϥ ⲛⲟⲩϩⲏⲧ ⲛⲣⲱⲙⲓ ⲁϥⲟϩⲓ ⲉⲣⲁⲧϥ ⲉϫⲉⲛⲛⲉϥϭⲁⲗⲁⲩϫ .
…
7 ⲡⲓⲙⲁϩⲃ ⲛⲑⲏⲣⲓⲟⲛ ⲉϥⲟⲛⲓ ⲛⲟⲩⲥⲁⲣⲝ ⲛⲣⲱⲙⲓ ⲛⲁϥⲟⲓ ⲛϩⲟϯ ⲉⲙⲁϣⲱ ⲟⲩⲟϩ ⲛⲁϥⲟϩⲓ ⲉⲣⲁⲧϥ ⲉϫⲉⲛⲡⲉϥⲥⲫⲓⲣ ⲛⲁⲓⲛⲁⲩ ⲉⲣⲟϥ ⲡⲉ ϣⲁⲛⲧⲟⲩⲕⲱϣ ⲛⲅ ⲙⲙⲉⲣⲟⲥ ⲛⲧⲉⲣⲱϥ ⲟⲩⲟϩ ⲡⲓⲙⲁϩⲇ ⲙⲙⲉⲣⲟⲥ ⲛⲧⲉⲣⲱϥ ⲛⲁϥⲧⲁϫⲣⲏⲟⲩⲧ ⲡⲉ ⲛⲁⲓⲛⲁⲩ ⲡⲉ ϣⲁⲛⲧⲟⲩⲫⲱⲣⲕ ⲛⲛⲉϥⲛⲁϫϩⲓ ⲉⲃⲟⲗϧⲉⲛ ⲣⲱϥ .
…
8 ⲡⲓⲙⲁϩⲅ ⲛⲑⲏⲣⲓⲟⲛ ⲉϥⲟⲓ ⲙⲫⲣⲏϯ ⲛⲟⲩⲡⲁⲣⲇⲁⲗⲓⲥ ⲉⲣⲉϩⲁⲛⲧⲉⲛϩ ⲉⲣⲟϥ ⲉⲣⲉⲇ ⲛⲁⲫⲉ ⲉⲣⲟϥ ⲉϥⲟⲩⲱⲙ ⲛⲭⲱⲗⲉⲙ ⲉϥϫⲱⲣ ⲉⲃⲟⲗ ⲙⲡⲕⲉⲥⲉⲡⲓ .
…
9 ⲡⲓⲙⲁϩⲇ ⲛⲑⲏⲣⲓⲟⲛ ⲛⲁⲓⲛⲁⲩ ⲉⲣⲟϥ ⲉϥⲟⲓ ⲙⲫⲣⲏϯ ⲛⲟⲩⲙⲟⲩⲓ ⲉϥⲟⲓ ⲛϩⲟϯ ⲉⲃⲟⲗⲟⲩⲧⲉ ⲛⲓⲑⲏⲣⲓⲟⲛ ⲧⲏⲣⲟⲩ ⲉⲧⲁⲩϣⲱⲡⲓ ϧⲁϫⲱϥ .
…
10 ⲁⲩϯ ⲛⲁϥ ⲛⲟⲩⲉⲝⲟⲩⲥⲓⲁ ⲛⲉⲙⲟⲩⲛⲓϣϯ ⲛϫⲟⲙ ⲛⲉϥϫⲓϫ ϩⲁⲛⲃⲉⲛⲓⲡⲓ ⲛⲉ ⲛⲉϥⲓⲉⲃ ϩⲁⲛϩⲟⲙⲧ ⲛⲉ ⲉϥⲟⲩⲱⲙ ⲉϥⲟⲩⲟϫⲃⲉϫ ⲉϥϧⲟⲙϧⲉⲙ ⲙⲡⲕⲉⲥⲉⲡⲓ ϧⲁⲣⲁⲧⲟⲩ ⲛⲛⲉϥϭⲁⲗⲁⲩϫ
…
11 ⲁⲓⲛⲁⲩ ⲉⲓ ⲛⲧⲁⲡ ⲉⲧⲁⲩⲓ ⲉⲡϣⲱⲓ ϧⲉⲛⲧⲉϥⲁⲫⲉ ⲟⲩⲟϩ ⲁⲓⲛⲁⲩ ⲉⲕⲉⲕⲟⲩϫⲓ ⲛⲧⲁⲡ ⲁϥⲓ ⲉⲡϣⲱⲓ ϧⲁⲧⲉⲛⲡⲓⲓ ⲛⲧⲁⲡ ⲁⲩϯ ⲛⲁϥ ⲛⲟⲩⲛⲓϣϯ ⲛⲉⲝⲟⲩⲥⲓⲁ ⲛⲉⲙⲟⲩϫⲟⲙ ⲉⲥϫⲟⲣ .
…
12 ⲁⲓⲛⲁⲩ ⲕⲉⲇ ⲉⲧⲁⲩⲓ ⲉⲡϣⲱⲓ ⲥⲁϫⲁϭⲏ ⲙⲙⲟϥ ⲟⲩⲟϩ ⲁⲓⲛⲁⲩ ⲉⲕⲉⲇ ⲉⲧⲁⲩⲓ ⲉⲡϣⲱⲓ ⲙⲉⲛⲉⲛⲥⲱⲟⲩ ⲧⲏⲣⲟⲩ ⲉⲣⲉⲡⲓⲟⲩⲁⲓ ⲡⲓⲟⲩⲁⲓ ϣⲉⲃⲓⲏⲟⲩⲧ ⲟⲩⲟϩ ⲛⲁⲓ ⲇⲉ ⲧⲏⲣⲟⲩ ⲥⲉⲓⲣⲓ ⲙⲓⲑ .
…
13 ⲁⲓⲥⲱⲧⲉⲙ ⲉⲟⲩⲥⲙⲏ ⲉϥϫⲱ ⲙⲙⲟⲥ ⲛⲏⲓ ϫⲉⲇⲁⲛⲓⲏⲗ ⲫⲣⲱⲙⲓ ⲛⲛⲓⲉⲡⲓⲑⲩⲙⲓⲁ ⲁⲣⲓⲉⲙⲓ ⲉⲛⲏⲉⲧⲁⲕⲛⲁⲩ ⲉⲣⲱⲟⲩ ⲁⲛⲟⲕ ⲇⲉ ⲡⲉϫⲏⲓ ⲛⲁϥ ϫⲉⲡⲱⲥ ⲟⲩⲟⲛϣϫⲟⲙ ⲙⲙⲟⲓ ϣⲁⲉⲛⲉϩ ⲉⲉⲙⲓ ⲁⲣⲉϣⲧⲉⲙ ⲟⲩⲁⲓ ϭⲓⲙⲱⲓⲧ ⲛⲏⲓ .
…
14 ⲁⲓϫⲟⲩϣⲧ ⲁⲓⲛⲁⲩ ⲉⲟⲩⲁⲅⲅⲉⲗⲟⲥ ⲛⲧⲉⲫⲛⲟⲩϯ ⲉϥⲟϩⲓ ⲉⲣⲁⲧϥ ⲥⲁⲟⲩⲓⲛⲁⲙ ⲙⲙⲟⲓ ⲉⲣⲉⲛⲉϥⲧⲉⲛϩ ⲟⲓ ⲛⲟⲩⲱⲓⲛⲓ ⲉⲙⲁϣⲱ ⲁⲓⲉⲣϩⲟϯ ⲁⲓϩⲉⲓ ⲉϧⲣⲏⲓ ϩⲓϫⲉⲛⲡⲓⲕⲁϩⲓ .
…
15 ⲁϥⲁⲙⲟⲛⲓ ⲙⲙⲟⲓ ⲛϫⲉⲡⲓⲁⲅⲅⲉⲗⲟⲥ ⲁϥⲧⲁϩⲟⲓ ⲉⲣⲁⲧⲡⲉϫⲁϥ ⲛⲏⲓ ϫⲉⲟϩⲓ ⲉⲣⲁⲧⲕ ⲉϫⲉⲛⲛⲉⲕϭⲁⲗⲁⲩϫ ⲛⲧⲁⲧⲁⲙⲟⲕ ⲉⲛⲏⲉⲑⲛⲁϣⲱⲡⲓ ϧⲉⲛⲧϧⲁⲏ ⲛⲧⲉⲛⲓⲥⲏⲟⲩ .
…
16 ⲡⲓⲇ ⲛⲑⲏⲣⲓⲟⲛ ⲉⲧⲁⲕⲛⲁⲩ ⲉⲣⲱⲟⲩ ⲇ ⲙⲙⲉⲧⲟⲩⲣⲟ ⲛⲉ ⲟⲩⲟϩ ⲡⲓⲑⲏⲣⲓⲟⲛ ⲉⲧⲁⲕⲛⲁⲩ ⲉⲣⲟϥ ⲉϥⲟⲓ ⲙⲫⲣⲏϯ ⲛⲟⲩⲗⲁⲃⲟⲓ ⲫⲁⲓ ⲡⲉ ⲡⲟⲩⲣⲟ ⲛⲧⲉⲛⲓⲡⲉⲣⲥⲓⲥ ϥⲛⲁⲁⲙⲟⲛⲓ ⲙⲡⲓⲕⲁϩⲓ ⲛⲫⲛⲉ ⲛⲣⲟⲙⲡⲓ ⲙⲉⲛⲉⲛⲥⲁⲛⲁⲓ ϥⲛⲁⲧⲁⲕⲟ ⲛⲉⲙⲧⲉϥⲙⲉⲧⲟⲩⲣⲟ ϥⲛⲁϫⲉⲙϫⲟⲙ ⲁⲛ ϣⲁⲉⲛⲉϩ .
…
17 ⲡⲓⲙⲁϩⲃ ⲛⲑⲏⲣⲓⲟⲛ ⲉⲧⲁⲕⲛⲁⲩ ⲉⲣⲟϥ ⲉϥⲟⲛⲓ ⲛⲟⲩⲥⲁⲣⲝ ⲛⲣⲱⲙⲓ ⲫⲁⲓ ⲡⲉ ⲡⲟⲩⲣⲟ ⲛⲧⲉⲛⲓⲣⲱⲙⲉⲟⲥ ϥⲛⲁⲁⲙⲟⲛⲓ ⲙⲡⲓⲕⲁϩⲓ ⲙⲫⲣⲏϯ ⲛⲟⲩⲃⲉⲛⲓⲡⲓ ϥⲛⲁⲫⲱⲣϣ ⲉⲃⲟⲗ ϩⲓϫⲱϥ ϥⲛⲁϣⲱⲡⲓ ϧⲉⲛⲟⲩϫⲟⲙ ϣⲁⲡⲓⲕⲁϩⲓ ⲛⲛⲓⲉⲑⲁⲩϣ ⲟⲩⲟϩ ϥⲛⲁⲉⲣⲟⲩⲣⲟ ϩⲓϫⲉⲛⲡⲕⲁϩⲓ ⲙⲧ ϣⲉ ⲓⲁ ⲛⲣⲟⲙⲡⲓ .
…
18 ⲁⲗⲗⲁ ϯⲡⲟⲗⲓⲥ ⲛⲧⲉϯⲙⲉⲧⲟⲩⲣⲟ ϥⲛⲁϫⲉⲙϫⲟⲙ ⲉⲣⲟⲥ ⲁⲛ ϣⲁⲛⲧⲟⲩϫⲱⲕ ⲉⲃⲟⲗ ⲛϫⲉϩⲁⲛⲉϩⲟⲟⲩ ⲉⲩⲟϣ .
…
19 ⲡⲓⲙⲁϩⲅ ⲛⲑⲏⲣⲓⲟⲛ ⲉⲧⲁⲕⲛⲁⲩ ⲉⲣⲟϥ ⲉϥⲟⲓ ⲙⲫⲣⲏϯ ⲛⲟⲩⲡⲁⲣⲇⲁⲗⲓⲥ ⲫⲁⲓ ⲡⲉ ⲡⲟⲩⲣⲟ ⲛⲛⲓϩⲉⲗⲏⲛⲟⲥ ϥⲛⲁⲉⲣⲟⲩⲣⲟ ϩⲓϫⲉⲛⲡⲕⲁϩⲓ ⲛⲟⲩϣⲟ ⲛⲣⲟⲙⲡⲓ ⲛⲉⲙⲗ ⲛⲉϩⲟⲟⲩ ⲟⲩⲟϩ ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉⲃⲟⲗ ⲁⲛ ϣⲁⲉⲃⲟⲗ .
…
20 ⲡⲓⲙⲁϩⲇ ⲛⲑⲏⲣⲓⲟⲛ ⲉⲧⲁⲕⲛⲁⲩ ⲉⲣⲟϥ ⲉϥⲟⲓ ⲙⲫⲣⲏϯ ⲛⲟⲩⲙⲟⲩⲓ ⲫⲁⲓ ⲡⲉ ⲡⲟⲩⲣⲟ ⲛⲧⲉⲛⲉⲛϣⲏⲣⲓ ⲉⲛⲓⲥⲙⲁⲏⲗ .
…
21 ⲧⲉϥⲙⲉⲧⲟⲩⲣⲟ ⲛⲁϣⲱⲡⲓ ϩⲓϫⲉⲛⲡⲕⲁϩⲓ ⲉⲥϫⲟⲣ ⲉⲙⲁϣⲱ ⲉϩⲁⲛⲙⲏϣ ⲛⲉϩⲟⲟⲩ .
…
22 ϯⲙⲉⲧⲟⲩⲣⲟ ⲉⲧⲉⲙⲙⲁⲩ ⲁⲥⲛⲁϣⲱⲡⲓ ⲉⲃⲟⲗϧⲉⲛ ⲡⲅⲉⲛⲟⲥ ⲛⲁⲃⲣⲁⲁⲙ ⲉⲃⲟⲗϧⲉⲛ ⲧⲃⲱⲕⲓ ⲛⲥⲁⲣⲣⲁ ⲧⲥϩⲓⲙⲓ ⲛⲁⲃⲣⲁⲁⲙ .
…
23 ⲥⲛⲁⲧⲁⲕⲟ ⲛⲛⲓⲡⲟⲗⲓⲥ ⲧⲏⲣⲟⲩ ⲛⲧⲉⲛⲓⲡⲉⲣⲥⲓⲥ ⲛⲉⲙⲛⲓⲣⲱⲙⲉⲟⲥ ⲛⲉⲙⲛⲓϩⲉⲗⲏⲛⲟⲥ ⲟⲩⲟϩ ⲓⲧ ⲛⲟⲩⲣⲟ ⲛⲁϣⲱⲡⲓ ϩⲓϫⲉⲛⲡⲕⲁϩⲓ ⲉⲃⲟⲗϧⲉⲛ ⲡⲓⲅⲉⲛⲟⲥ ⲉⲧⲉⲙⲙⲁⲩ ⲉⲃⲟⲗϧⲉⲛ ⲛⲉⲛϣⲏⲣⲓ ⲛⲛⲓⲥⲙⲁⲏⲗ ϣⲁⲡϫⲱⲕ ⲛⲧⲟⲩϧⲁⲏ ⲉⲑⲛⲁϣⲱⲡⲓ .
…
24 ⲡⲓⲙⲁϩⲓ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ϥⲛⲁϣⲱⲡⲓ ⲙⲫⲣⲏϯ ⲛⲟⲩⲡⲣⲟⲫⲏⲧⲏⲥ ⲧⲏⲡⲓ ⲛⲧⲉⲡⲉϥⲣⲁⲛ ⲧϥⲑ ϥⲛⲁⲓⲣⲓ ⲛⲟⲩⲇⲓⲕⲉⲟⲥⲩⲛⲏ ϥⲛⲁϯ ⲛⲟⲩⲱⲓⲕ ⲛⲛⲏⲉⲧϩⲟⲕⲉⲣ ⲟⲩϩⲉⲃⲥⲱ ⲛⲛⲏⲉⲑⲃⲏϣ ⲟⲩⲟϩ ϥⲛⲁⲓⲣⲓ ⲛⲟⲩⲥⲱϯ ⲛⲛⲏⲉⲧⲟⲓ ⲙⲃⲱⲕ ⲧⲉϥⲙⲉⲧⲛⲁⲏⲧ ⲛⲁⲫⲱⲣϣ ⲉⲃⲟⲗ ϩⲓϫⲉⲛⲡⲕⲁϩⲓ ⲧⲏⲣϥ ⲛⲉⲙⲟⲩⲇⲓⲕⲉⲟⲥⲩⲛⲏ ϣⲁⲉϩⲣⲏⲓ ⲉⲡϭⲓⲥⲓ ⲛⲧⲫⲉ .
…
25 ⲡⲓⲙⲁϩⲓⲁ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ϥⲛⲁⲓⲣⲓ ⲛⲟⲩϭⲓⲛϫⲟⲛⲥ ϩⲓϫⲉⲛⲡⲕⲁϩⲓ ⲧⲏⲣϥ ϥⲛⲁⲧⲁⲕⲟ ⲛϩⲁⲛⲙⲟⲩⲛⲕⲛϫⲓϫ ⲛⲁⲣⲭⲉⲟⲥ .
…
26 ϥⲛⲁϩⲟϫϩⲉϫ ⲛⲛⲏⲉⲧϣⲟⲡ ϩⲓϫⲉⲛⲡⲕⲁϩⲓ ⲛⲧⲉⲕϣⲧⲉⲙϫⲉⲙ ⲫⲏⲉⲧϣⲟⲡ ⲟⲩⲇⲉ ⲡⲉⲧϯ ⲉⲃⲟⲗ ⲉⲩϥⲓⲁϩⲟⲙ ⲧⲏⲣⲟⲩ ⲛⲙⲃ ⲛⲁⲃⲟⲧ ⲉϣⲱⲡ ⲁⲣⲉϣⲁⲛ ⲫⲛⲟⲩϯ ⲛⲧⲉⲧⲫⲉ ⲱⲟⲩⲛϩⲏⲧ ⲉϩⲣⲏⲓ ⲉϫⲱϥ ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉⲃⲟⲗ ⲛⲙ ⲛⲁⲃⲟⲧ .
…
27 ⲡⲓⲙⲁϩⲓⲃ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ⲧⲉϥⲙⲉⲧⲟⲩⲣⲟ ⲛⲁϣⲱⲡⲓ ⲉⲥϫⲟⲣ ⲕⲁⲧⲁⲛⲓϩⲁⲡ ⲛⲧⲉⲣⲱϥ .
…
28 ϥⲛⲁⲓⲣⲓ ϩⲓϫⲉⲛⲡⲕⲁϩⲓ ⲛϩⲁⲛϩⲱⲃ ⲉⲩⲫⲟⲛϩ ϧⲉⲛⲧⲉϥⲙⲉⲧⲟⲩⲣⲟ ϣⲁⲛⲧⲟⲩⲉⲣϣⲫⲏⲣⲓ ⲛⲛⲏⲉⲧⲉϥⲛⲁⲁⲓⲧⲟⲩ .
…
29 ⲟⲩⲟⲛ ⲟⲩⲙⲏϣ ⲙⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛⲧⲉϥⲙⲉⲧⲟⲩⲣⲟ ϧⲉⲛⲧϧⲁⲏ ⲛⲧⲉⲛⲓⲥⲏⲟⲩ ⲟⲩⲟⲛ ⲟⲩⲟⲩⲣⲟ ⲛⲁϣⲑⲟⲣⲧⲉⲣ ⲛⲧⲙⲉⲧⲟⲩⲣⲟ ⲧⲏⲣⲥ ⲛⲛⲉⲛϣⲏⲣⲓ ⲛⲛⲓⲥⲙⲁⲏⲗ ⲛⲣⲙⲍ ⲛⲣⲟⲙⲡⲓ .
…
30 ⲟⲩⲟϩ ϧⲉⲛϯⲙⲁϩⲣⲓ ⲛⲣⲟⲙⲡⲓ ⲛⲧⲉⲧⲉϥⲙⲉⲧⲟⲩⲣⲟ ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛⲧⲉϥⲙⲏϯ ⲛⲉⲙⲛⲓⲉⲑⲁⲩϣ .
…
31 ⲛⲉⲛϣⲏⲣⲓ ⲉⲛⲓⲥⲙⲁⲏⲗ ⲛⲁⲉⲣϭⲥ ⲉⲣⲱⲟⲩ ϣⲁⲛⲧⲟⲩϩⲱⲗ ⲉϯⲡⲟⲗⲓⲥ ⲛⲧⲉϯⲙⲉⲧⲟⲩⲣⲟ ⲉⲧⲉⲥⲟⲩⲃ ⲁⲛ ⲧⲉ .
…
32 ⲥⲉⲛⲁⲟⲩⲱⲣⲡ ⲛⲱⲟⲩ ⲉⲩⲕⲱϯ ⲛⲥⲁⲟⲩϩⲓⲣⲏⲛⲏ ⲥⲉⲛⲁϯ ⲛⲱⲟⲩ ⲛⲟⲩϩⲁⲧ ⲛⲉⲙⲟⲩⲛⲟⲩⲃ ⲉϥⲟϣ ⲥⲉⲛⲁϣⲱⲡⲓ ⲉⲩϯ ϩⲱϯ ⲛⲱⲟⲩ ϧⲉⲛⲛⲓⲉⲑⲁⲩϣ .
…
33 ⲡⲓⲙⲁϩⲓⲅ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ⲙⲙⲟⲛ ⲛⲁⲓϣⲟⲡⲛϧⲏⲧϥ ⲁⲛ ⲉⲡⲧⲏⲣϥ ⲟⲩⲇⲉ ϩⲟϯ ⲙⲡⲉϥⲙⲑⲟ ⲉⲃⲟⲗ ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉⲃⲟⲗ ⲉϩⲁⲛⲕⲟⲩϫⲓ ⲛⲉϩⲟⲟⲩ ⲇⲉⲟⲥ .
…
34 ⲡⲓⲙⲁϩⲓⲇ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ϥⲛⲁϭⲓ ⲛⲟⲩⲛⲟⲩⲃ ⲛⲉⲙⲟⲩϩⲁⲧ ⲉϥⲟϣ ϥⲛⲁϯϩⲁⲡ ⲉⲡⲕⲁϩⲓ ϧⲉⲛⲟⲩⲇⲓⲕⲉⲟⲥⲩⲛⲏ .
…
35 ϥⲛⲁⲑⲱⲟⲩϯ ⲛⲟⲩⲡⲟⲗⲉⲙⲟⲥ ϧⲉⲛⲭⲏⲙⲓ ⲛⲧⲉⲭⲏⲙⲓ ⲙⲧⲟⲛ ⲙⲙⲟϥ ϧⲉⲛⲛⲟⲩϧⲓⲥⲓ ⲛⲉⲙⲛⲟⲩϥⲓⲁϩⲟⲙ .
…
36 ⲛⲓⲉⲑⲁⲩϣ ⲛⲁϭⲛⲉϫⲱⲟⲩ ⲛⲁϥ ⲁⲛ ⲉⲡⲧⲏⲣϥ ⲟⲩⲇⲉ ⲥⲉⲛⲁϯ ϩⲱϯ ⲛⲁϥ ⲁⲛ ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛⲡⲓⲕⲁϩⲓ ⲛⲧⲉⲛⲓⲣⲱⲙⲉⲟⲥ ϧⲉⲛⲛⲓⲉϩⲟⲟⲩ ⲉⲧⲉⲙⲙⲁⲩ .
…
37 ⲛⲓⲉⲑⲁⲩϣ ⲥⲉⲛⲁⲉⲣⲡⲟⲗⲉⲙⲓⲛ ⲛⲉⲙⲛⲓⲥⲁ ⲛⲧⲉⲫⲣⲏⲥ ⲥⲉⲛⲁϣⲱⲗ ⲛⲛⲓϯⲙⲓ ⲛⲉⲙⲛⲓⲃⲁⲕⲓ ⲧⲏⲣⲟⲩ ⲛⲧⲉⲭⲏⲙⲓ ϣⲁⲛⲧⲟⲩⲫⲟϩ ⲉϯⲃⲁⲕⲓ ⲉⲧⲁ ⲕⲗⲉⲟⲡⲁⲧⲣⲁ ⲕⲟⲧⲥ ϧⲉⲛⲫⲙⲁⲣⲏⲥ ⲉⲧⲉϣⲙⲟⲩⲛ ⲧⲉ .
…
38 ⲙⲉⲛⲉⲛⲥⲁⲛⲁⲓ ⲡⲟⲩⲣⲟ ⲛⲧⲉϯⲥⲩⲣⲓⲁ ⲛⲁⲥⲱⲧⲉⲙ ϥⲛⲁⲉⲣϩⲟϯ ⲉⲡϧⲁⲉ ϫⲉⲁ ⲡⲓⲡⲟⲗⲉⲙⲟⲥ ϧⲱⲛⲧ ⲉⲣⲟϥ .
…
39 ⲟⲩⲟϩ ⲉⲡϧⲁⲉ ⲉϥⲛⲁⲥⲉⲙⲛⲓ ⲧⲉϥⲙⲉⲧⲟⲩⲣⲟ ⲛⲁⲟϩⲓ ⲉⲣⲁⲧⲥ ⲛⲕⲁⲗⲱⲥ .
…
40 ⲙⲉⲛⲉⲛⲥⲁⲛⲁⲓ ϥⲛⲁⲧⲱⲛϥ ⲛϫⲉⲟⲩⲁⲗⲟⲩ ⲉⲃⲟⲗϧⲉⲛ ⲛⲉⲛϣⲏⲣⲓ ⲉⲛⲓⲥⲙⲁⲏⲗ ⲉⲧⲉⲫⲁⲓ ⲡⲉ ⲡⲓⲙⲁϩⲓⲉ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ .
…
41 ϥⲛⲁϣⲱⲡⲓ ⲉϥⲛⲁϣⲧ ϧⲉⲛⲧⲉϥⲯⲩⲭⲏ ⲙⲫⲣⲏϯ ⲙⲡⲓⲃⲉⲛⲓⲡⲓ ϥⲛⲁⲭⲱ ⲛⲧⲉϥⲥⲏϥⲓ ϣⲁⲛⲓⲣⲱⲙⲉⲟⲥ ⲧⲉϥϫⲓϫ ⲛⲟⲩⲓⲛⲁⲙ ⲉϫⲉⲛⲛⲓⲉⲑⲁⲩϣ ϥⲛⲁϣⲱⲡⲓ ⲛϩⲟⲃ ⲛⲉⲙⲗⲁⲥⲃ .
…
42 ⲉϩⲣⲏⲓ ϧⲉⲛⲛⲓⲉϩⲟⲟⲩ ⲛⲧⲉⲧⲉϥⲙⲉⲧⲟⲩⲣⲟ ⲟⲩⲟⲛ ⲟⲩⲛⲓϣϯ ⲛϣⲑⲟⲣⲧⲉⲣ ⲛⲁϣⲱⲡⲓ ϩⲓϫⲉⲛⲡⲕⲁϩⲓ ⲧⲏⲣϥ ⲟⲩⲟϩ ϥⲛⲁϣⲱⲡⲓ ϫⲉⲡⲉϥⲥⲁϫⲓ ⲉϥⲛⲁϣⲧ ⲙⲫⲣⲏϯ ⲛⲟⲩⲭⲣⲱⲙ .
…
43 ⲛⲓⲉⲑⲁⲩϣ ⲛⲁⲓⲛⲓ ⲛⲁϥ ⲛϩⲁⲛⲇⲱⲣⲟⲛ ⲟⲩⲛⲟⲩⲃ ⲛⲉⲙⲟⲩϩⲁⲧ ⲛⲉⲙⲟⲩⲙⲁⲣⲅⲁⲣⲓⲧⲏⲥ ⲟⲩⲟϩ ϥⲛⲁⲭⲱ ⲉⲃⲟⲗ ⲙⲡⲉϥϧⲓⲥⲓ ⲉϫⲉⲛⲟⲩⲟⲛ ⲛⲓⲃⲉⲛ .
…
44 ϥⲛⲁⲉⲣⲉⲭⲙⲁⲗⲱⲧⲉⲩⲓⲛ ⲛⲟⲩⲙⲏϣ ⲛⲕⲁϩⲓ ⲛⲧⲉϥϩⲉϫϩⲱϫⲟⲩ ⲟⲩⲟϩ ⲛⲛⲟⲩⲥⲓ ⲛⲱⲓⲕ ⲛⲉⲙⲛⲓⲉϩⲟⲟⲩ ⲧⲏⲣⲟⲩ ⲛⲧⲉⲧⲉϥⲙⲉⲧⲟⲩⲣⲟ ⲟⲩⲇⲉ ⲛⲛⲉ ϩⲓⲣⲏⲛⲏ ϣⲱⲡⲓ ⲛⲛⲓⲉϩⲟⲟⲩ ⲛⲧⲉⲧⲉϥⲙⲉⲧⲟⲩⲣⲟ ⲟⲩⲟϩ ⲟⲩⲙⲏϣ ⲛϣⲱⲗ ⲛⲁϣⲱⲡⲓ ϧⲉⲛⲛⲉϥⲉϩⲟⲟⲩ .
…
45 ⲡⲓⲙⲁϩⲓⲋ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ⲙⲙⲟⲛ ⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛⲧⲉϥⲙⲉⲧⲟⲩⲣⲟ ⲟⲩⲇⲉ ⲛⲑⲟϥ ϩⲱϥ ϥⲛⲁⲉⲣⲡⲟⲗⲉⲙⲓⲛ ⲛⲉⲙϩⲗⲓ ⲁⲛ .
…
46 ⲥⲉⲛⲁϯ ⲛⲁϥ ⲛⲟⲩⲛⲓϣϯ ⲛⲥⲏⲟⲩ ⲛϩⲓⲣⲏⲛⲓⲕⲟⲛ ⲟⲩⲟϩ ⲧⲉϥⲙⲉⲧⲟⲩⲣⲟ ⲛⲁⲟϩⲓ ⲉⲣⲁⲧⲥ ϧⲉⲛⲟⲩⲥⲱⲟⲩⲧⲉⲛ .
…
47 ⲡⲓⲙⲁϩⲓⲍ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ⲟⲩⲧⲱϥ ⲛⲉⲙⲡⲉϥⲅⲉⲛⲟⲥ ⲫⲁⲓ ⲉⲧⲉⲡⲉϥⲣⲁⲛ ⲛⲁⲓⲣⲓ ⲛⲭⲝⲋ ⲛⲏⲡⲓ .
…
48 ϥⲛⲁⲧⲱⲛϥ ⲛϫⲉⲟⲩⲁⲓ ⲉⲃⲟⲗϧⲉⲛ ⲡⲉϥⲅⲉⲛⲟⲥ ⲛⲧⲉϥⲉⲣⲡⲟⲗⲉⲙⲓⲛ ⲛⲉⲙⲁϥ ϥⲛⲁϭⲟϫⲓ ⲛⲥⲱϥ ϣⲁⲉϧⲣⲏⲓ ⲉⲭⲏⲙⲓ ⲛⲉⲙⲛⲓⲭⲣⲏⲙⲁ ⲛⲧⲉⲧⲉϥⲙⲉⲧⲟⲩⲣⲟ .
…
49 ⲟⲩⲟϩ ϥⲛⲁⲭⲱ ⲙⲡⲉϥⲅⲉⲛⲟⲥ ⲛⲥⲱϥ ⲛⲉⲙⲡⲉϥⲙⲏϣ ⲟⲩⲟϩ ϥⲛⲁⲥⲓϯ ⲛⲛⲓⲭⲣⲏⲙⲁ ⲉⲃⲟⲗ ϧⲉⲛⲛⲓϧⲓⲣ ⲛⲉⲙⲛⲓⲙⲁⲛⲙⲟϣⲓ .
…
50 ⲉϥⲛⲏⲟⲩ ϣⲉ ⲉϧⲣⲏⲓ ⲉⲭⲏⲙⲓ ⲛⲉⲙⲛⲓⲭⲣⲏⲙⲁ ⲟⲩⲟϩ ϥⲛⲁⲓ ⲉⲫⲙⲁⲣⲏⲥ ϧⲉⲛⲭⲏⲙⲓ ⲉϥⲟⲩⲱϣ ⲉϩⲱⲗ ⲉⲥⲟⲩⲃⲁⲛ ⲧⲡⲟⲗⲓⲥ ⲛⲛⲓⲉⲑⲁⲩϣ ⲛⲉⲙⲡⲥⲉⲡⲓ ⲛⲛⲓⲭⲣⲏⲙⲁ .
…
51 ⲟⲩⲟϩ ϥⲛⲁϧⲟⲑⲃϥ ⲛϫⲉⲟⲩⲁⲓ ⲉⲃⲟⲗϧⲉⲛ ⲡⲉϥⲅⲉⲛⲟⲥ ϧⲉⲛⲛⲓⲥⲁ ⲛⲧⲉⲫⲙⲁⲣⲏⲥ ⲛⲭⲏⲙⲓ ϥⲛⲁⲱⲗⲓ ⲙⲡⲥⲏⲡⲓ ⲛⲧⲉⲛⲓⲭⲣⲏⲙⲁ .
…
52 ⲡⲓⲙⲁϩⲓⲏ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗ ⲛϧⲏⲧⲟⲩ ϧⲉⲛⲧⲁⲣⲭⲏ ⲛⲧⲉⲧⲉϥⲙⲉⲧⲟⲩⲣⲟ ⲟⲩⲟϩ ϥⲛⲁⲓⲣⲓ ⲛϩⲁⲛⲛⲓϣϯ ⲙⲡⲉⲧϩⲱⲟⲩ ⲛⲟⲩϣⲟ ⲛⲉⲙⲥ ⲛⲉⲙⲝ ⲛⲉϩⲟⲟⲩ .
…
53 ⲟⲩⲟϩ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϩⲓϫⲱϥ ϧⲉⲛⲛⲓⲥⲁ ⲉⲧⲥⲁⲡⲉⲙⲉⲛⲧ ϥⲛⲁϭⲓ ⲙⲡⲓϭⲣⲟ ϣⲁⲡⲓⲉϩⲟⲟⲩ ⲛⲧⲉⲡⲉϥⲙⲟⲩ .
…
54 ⲙⲉⲛⲉⲛⲥⲱⲥ ϥⲛⲁⲧⲱⲛϥ ⲛϫⲉⲟⲩⲁⲗⲟⲩ ⲉⲃⲟⲗⲛϧⲏⲧⲟⲩ ⲉⲧⲉⲡⲉϥϣⲏⲣⲓ ⲡⲉ ⲉⲧⲉⲫⲁⲓ ⲡⲉ ⲡⲓⲙⲁϩⲓⲑ ⲛⲟⲩⲣⲟ ⲉⲑⲛⲁϣⲱⲡⲓ ⲉⲃⲟⲗⲛϧⲏⲧⲟⲩ ⲉⲩⲛⲁϫⲫⲟϥ ⲅⲁⲣ ⲉⲃⲟⲗϧⲉⲛ ⲅⲉⲛⲟⲥⲃ ⲡⲉϥⲉⲓⲱⲧ ⲇⲉ ⲟⲩⲉⲃⲟⲗ ⲡⲉ ϧⲉⲛⲛⲉⲛϣⲏⲣⲓ ⲛⲓⲥⲙⲁⲏⲗ ⲧⲉϥⲙⲁⲩ ⲟⲩⲣⲱⲙⲉⲟⲥ ⲧⲉ .
…
55 ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛⲭⲏⲙⲓ ⲛⲉⲙϯⲥⲩⲣⲓⲁ ⲛⲕⲁ ⲛⲁⲃⲟⲧ .
…
56 ⲧⲟⲩⲥⲏϥⲓ ⲅⲁⲣ ⲛⲁϩⲓ ⲛϧⲏⲧⲟⲩ ⲙⲙⲓⲛⲙⲙⲱⲟⲩ ϧⲉⲛⲡⲓⲡⲟⲗⲉⲙⲟⲥ ⲡⲓⲟⲩⲣⲟ ⲉⲧⲉⲙⲙⲁⲩ ⲫⲁⲓ ⲉⲧⲉⲡⲉϥⲣⲁⲛ ⲓⲣⲓ ⲛⲭⲝⲋ ⲉⲛⲏⲡⲓ ⲟⲩⲟϩ ⲉϥⲙⲟⲩϯ ⲉⲧⲉⲅ ⲛⲣⲁⲛ ⲉⲧⲉⲛⲁⲓ ⲛⲉ ⲙⲁⲙⲉⲧⲓⲟⲥ ⲛⲉⲙⲭⲁⲗⲗⲉ ⲛⲉⲙⲥⲁⲣⲁⲡⲓⲛⲟⲥ .
…
57 ϥⲛⲁⲉⲣⲟⲩⲣⲟ ⲅⲁⲣ ⲉϥⲟⲓ ⲛⲁⲗⲟⲩ ⲛⲧⲉϥⲓⲣⲓ ⲛϩⲁⲛⲛⲓϣϯ ⲙⲡⲉⲧϩⲱⲟⲩ ϥⲛⲁⲟⲩⲁϩⲥⲁϩⲛⲓ ⲛⲛⲓⲓⲟⲩⲇⲁⲓ ⲧⲏⲣⲟⲩ ⲉⲧϧⲉⲛⲙⲁⲓ ⲛⲓⲃⲉⲛ ⲛⲥⲉⲧⲁⲥⲑⲱⲟⲩ ⲉϩⲓⲉⲣⲟⲩⲥⲁⲗⲏⲙ ⲡⲕⲁϩⲓ ⲧⲏⲣϥ ⲛⲁϣⲑⲟⲣⲧⲉⲣ ϧⲉⲛⲛⲓⲉϩⲟⲟⲩ ⲛⲧⲉⲧⲉϥⲙⲉⲧⲟⲩⲣⲟ ϣⲁⲛⲧⲟⲩϯ ⲛⲟⲩⲣⲱⲙⲓ ⲉⲃⲟⲗ ϧⲁⲟⲩⲛⲟⲙⲓⲥⲙⲁ ⲛⲟⲩⲱⲧ .
…
58 ⲟⲩⲟϩ ⲛⲁⲧϣⲓⲡⲓ ⲉⲧⲉⲙⲙⲟϥ ⲟⲩⲟϩ ϥⲛⲁⲉⲣⲡⲱⲃϣ ⲛϯϩⲟϯ ⲛⲧⲉⲫⲛⲟⲩϯ .
…
59 ϥⲛⲁⲉⲣⲫⲙⲉⲩⲓ ⲁⲛ ⲙⲫⲛⲟⲙⲟⲥ ⲛⲓⲥⲙⲁⲏⲗ ⲡⲉϥⲉⲓⲱⲧ ⲟⲩⲇⲉ ⲧⲉϥⲙⲁⲩ ϫⲉⲟⲩⲣⲱⲙⲉⲟⲥ ⲧⲉ ϥⲛⲁϣⲱⲡⲓ ⲉϥⲟⲓ ⲛⲉⲩⲑⲁⲧⲏⲥ ⲟⲩⲟϩ ⲛⲣⲉϥⲑⲓϧⲓ ⲛⲛⲁⲩ ⲛⲓⲃⲉⲛ .
…
60 ϥⲛⲁϧⲱⲧⲉⲃ ⲛⲟⲩⲙⲏϣ ⲉⲩⲟⲩⲱⲙ ⲛⲉⲙⲁϥ ϩⲓϫⲉⲛϯⲧⲣⲁⲡⲉⲍⲁ ϧⲉⲛϩⲁⲛⲧⲥⲟ ⲛⲧⲉϩⲁⲛⲫⲁϧⲣⲓ ⲙⲙⲁⲅⲓⲁ ⲟⲩⲟⲛ ϩⲁⲛⲛⲓϣϯ ⲛϣⲱϣ ⲛⲁϣⲱⲡⲓ ϧⲉⲛⲛⲓⲉϩⲟⲟⲩ ⲉⲧⲉⲙⲙⲁⲩ .
…
61 ϯⲥⲩⲣⲓⲁ ⲛⲉⲙⲡⲕⲁϩⲓ ⲛⲛⲓⲓⲟⲩⲇⲁⲓ ϥⲛⲁⲁⲓⲧⲟⲩ ⲛⲣⲉⲙϩⲉ ⲟⲩⲟϩ ϯⲁⲛⲁⲧⲟⲗⲏ ⲛⲉⲙⲭⲏⲙⲓ ϥⲛⲁϯϧⲓⲥⲓ ⲛⲱⲟⲩ ϥⲛⲁⲑⲱϣ ⲛϩⲁⲛⲉⲡⲓⲥⲧⲟⲗⲁⲣⲓⲟⲥ ϧⲉⲛⲭⲏⲙⲓ .
…
62 ϯⲁⲛⲁⲧⲟⲗⲏ ⲃ ⲛⲉⲙⲅ ⲉϫⲉⲛⲛⲟⲩⲉⲣⲏⲟⲩ ϧⲉⲛⲟⲩⲣⲟⲙⲡⲓ ⲛⲟⲩⲱⲧ ⲛϩⲣⲏⲓ ϧⲉⲛⲧⲙⲉⲧⲟⲩⲣⲟ ⲙⲫⲁⲓ ⲉⲧⲉⲡⲓⲙⲁϩⲓⲑ ⲡⲉ ϥⲛⲁϣⲱⲡⲓ ⲛⲥⲁⲟⲩϩⲁⲡ ⲁⲛ ⲟⲩⲇⲉ ⲟⲩⲙⲉⲑⲙⲏⲓ ⲁⲗⲗⲁ ϥⲛⲁϣⲱⲡⲓ ⲛⲥⲁⲟⲩⲛⲟⲩⲃ ⲛⲛⲁⲩ ⲛⲓⲃⲉⲛ .
…
63 ⲟⲩⲟϩ ϥⲛⲁⲑⲱϣ ⲛⲟⲩⲉⲡⲓⲇⲣⲟⲡⲟⲥ ϧⲉⲛⲛⲓⲥⲁ ⲛⲧⲉϯⲁⲫⲣⲓⲕⲓⲁ ⲛⲉⲙⲟⲩⲛⲓϣϯ ⲙⲙⲏϣ ⲟⲩⲟϩ ϥⲛⲁϣⲱⲡⲓ ⲛϫⲉⲟⲩⲡⲟⲗⲉⲙⲟⲥ ϧⲉⲛⲧⲉϥⲙⲏϯ ⲛⲉⲙⲱⲟⲩ .
…
64 ⲥⲉⲛⲁϥⲱϯ ⲉⲃⲟⲗ ⲙⲡⲓⲙⲏϣ ⲉⲑⲛⲉⲙⲁϥ ϥⲛⲁϩⲉⲙⲥⲓ ϧⲉⲛⲛⲓⲥⲁ ⲛⲧⲉϯⲁⲫⲣⲓⲕⲏ ⲛⲉⲙⲛⲏⲉⲑⲛⲁⲥⲉⲡⲓ ϧⲉⲛⲡⲓⲙⲏϣ ⲉⲑⲛⲉⲙⲁϥ ⲛⲟⲩⲙⲏϣ ⲛⲣⲟⲙⲡⲓ ⲟⲩⲟϩ ϥⲛⲁϭⲣⲟ ⲉⲣⲟⲥ ⲁⲛ .
…
65 ⲙⲉⲛⲉⲛⲥⲱⲥ ϥⲛⲁⲧⲱⲛϥ ⲉϩⲣⲏⲓ ⲉϫⲱϥ ⲛϫⲉⲟⲩⲉⲑⲛⲟⲥ ⲛϣⲉⲙⲙⲟ ⲉⲩⲙⲟⲩϯ ⲉⲣⲟϥ ϫⲉⲡⲓⲧⲟⲩⲣⲅⲟⲥ ϥⲛⲁⲉⲣⲡⲟⲗⲉⲙⲓⲛ ⲛⲉⲙⲁϥ .
…
66 ⲟⲩⲟϩ ⲥⲁⲣⲁⲡⲓⲇⲟⲥ ⲛⲁⲉⲣϭⲥ ⲉϩⲁⲛⲙⲏϣ ⲛⲣⲱⲉⲟⲥ ⲛⲉⲙϯⲡⲉⲛⲧⲁⲡⲟⲗⲓⲥ ⲛⲉⲙⲛⲓⲙⲏⲧⲟⲥ ⲟⲩⲟϩ ϥⲛⲁⲱⲗⲓ ⲧⲏⲣⲟⲩ ⲛⲧⲉϥⲉⲣϭⲥ ⲉⲛⲟⲩⲡⲟⲗⲓⲥ ⲛⲧⲉϥϩⲱⲗ ⲉϯⲃⲁⲕⲓ ⲉⲧⲁϥⲕⲟⲧⲥ ⲛⲉⲙⲛⲓⲭⲱⲣⲁ ⲉⲧⲁϥⲑⲟⲩⲱⲧⲟⲩ ⲉϧⲟⲩⲛ ⲛϫⲉⲡⲉϥⲓⲱⲧ .
…
67 ⲡⲓⲧⲟⲩⲣⲅⲟⲥ ⲛⲁⲑⲱⲟⲩϯ ⲉⲣⲟϥ ⲉⲛⲟⲩⲡⲟⲗⲉⲙⲟⲥ ⲉϥⲟⲩⲱϣ ⲉⲱⲗⲓ ⲛϯⲙⲉⲧⲟⲩⲣⲟ ⲛⲧⲟⲧϥ ⲛⲥⲁⲣⲁⲡⲓⲇⲟⲥ .
…
68 ⲉⲧⲓ ⲉϥϩⲉⲙⲥⲓ ϧⲉⲛⲡⲉϥⲏⲓ ⲛϫⲉⲡⲓⲥⲁⲣⲁⲡⲓⲇⲟⲥ ⲉⲣⲉⲛⲓϣⲱⲗ ⲭⲏ ⲙⲡⲉϥⲙⲑⲟ ⲉϥⲉⲣⲑⲉⲱⲣⲓⲛ ⲛϯⲛⲓϣϯ ⲙⲙⲉⲧⲣⲁⲙⲁⲟ ⲡⲓⲛⲟⲩⲃ ⲛⲉⲙⲡⲓϩⲁⲧ ⲛⲉⲙⲱⲛⲓ ⲛⲓⲃⲉⲛ ⲉⲧⲧⲁⲓⲏⲟⲩⲧ ⲛⲉⲙⲥⲕⲟⲥ ⲛⲓⲃⲉⲛ ⲛϣⲟⲩⲉⲣⲉⲡⲓⲑⲩⲙⲓⲛ ⲉⲣⲟϥ .
…
69 ⲥⲉⲛⲁⲉⲛ ⲡⲓϣⲓⲛⲓ ⲛⲁϥ ϫⲉⲁ ⲡⲓⲧⲟⲩⲣⲅⲟⲥ ⲉⲣϭⲥ ⲉϯⲥⲩⲣⲓⲁ ⲧⲏⲣⲥ ⲛⲉⲙⲛⲉⲥⲑⲟϣ ϥⲛⲁⲓ ⲉⲃⲟⲗϧⲉⲛ ⲟⲩⲛⲓϣϯ ⲛϣⲑⲟⲣⲧⲉⲣ ⲛⲉⲙⲡⲉϥⲙⲏϣ ⲧⲏⲣϥ ⲟⲩⲟϩ ⲛⲓϣⲱⲗ ⲧⲏⲣⲟⲩ ϥⲛⲁⲭⲁⲩ ⲛⲥⲱϥ ϥⲛⲁⲱⲗⲓ ⲛϩⲗⲓ ⲛϧⲏⲧⲟⲩ ⲛⲉⲙⲁϥ ⲁⲛ .
…
70 ⲁⲗⲗⲁ ⲁϥⲛⲁϣⲱⲡⲓ ϧⲉⲛⲟⲩϩⲏⲧ ⲛⲑⲏⲣⲓⲟⲛ ⲉϥⲙⲉⲩⲓ ⲉⲃⲟⲗ ⲉϥⲉⲙⲓ ⲁⲛ ϫⲉϥⲛⲁⲉⲣ ⲟⲩ .
…
71 ⲁϥϣⲁⲛⲫⲱⲧ ⲇⲉ ϫⲉϥⲛⲏⲟⲩ ⲉϧⲣⲏⲓ ⲉⲭⲏⲙⲓ ⲡⲓⲧⲟⲩⲣⲅⲟⲥ ⲛⲁⲉⲣϣⲟⲣⲡ ⲉⲣⲟϥ ⲛⲉⲙⲡⲉϥⲙⲏϣ .
…
72 ⲟⲩⲟϩ ⲥⲉⲛⲁⲉⲣⲉⲡⲁⲛⲧⲁⲛ ⲉⲛⲟⲩⲉⲣⲏⲟⲩ ⲛⲉⲙⲡⲟⲩⲙⲏϣ ⲥⲉⲛⲁϯ ⲛⲉⲙⲛⲟⲩⲉⲣⲏⲟⲩ ϣⲁⲧⲉ ⲡⲓⲥⲛⲟϥ ϧⲁϯ ⲉⲃⲟⲗ ⲉⲙⲁϣⲱ ⲟⲩⲟϩ ⲡⲓⲧⲟⲩⲣⲅⲟⲥ ⲟⲩⲉⲃⲟⲗ ⲡⲉ ϧⲉⲛⲡⲅⲉⲛⲟⲥ ⲛⲛⲓⲣⲱⲙⲉⲟⲥ .
…
73 ⲡⲓⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛϣⲙⲟⲩⲛ ϯⲃⲁⲕⲓ ϣⲁⲧⲉ ⲡⲓⲙⲱⲟⲩ ⲛⲧⲉⲫⲓⲁⲣⲟ ⲉⲣⲥⲛⲟϥ ϩⲓⲧⲉⲛⲡⲁϣⲁⲓ ⲛⲛⲓϧⲱⲧⲉⲃ ⲛⲛⲟⲩϣⲧⲉⲙⲥⲉ ⲙⲱⲟⲩ ⲉⲃⲟⲗ ⲛϧⲏⲧϥ .
…
74 ⲟⲩⲟⲛ ⲟⲩⲙⲏϣ ⲛⲣⲱⲙⲓ ⲛⲁⲙⲟⲩ ⲛⲧⲥⲏϥⲓ ⲛⲁⲧϭⲓⲏⲡⲓ ⲙⲙⲱⲟⲩ ⲫⲏⲉⲑⲛⲁⲥⲉⲡⲓ ⲛⲧⲱⲟⲩ ⲥⲉⲛⲁϩⲱⲗ ⲉⲧⲟⲩⲭⲱⲣⲁ ⲡⲓⲙⲁ ⲉⲧⲁⲩⲓ ⲉⲃⲟⲗ ⲛϧⲏⲧϥ .
…
75 ⲡⲓⲧⲟⲩⲣⲅⲟⲥ ⲛⲁϧⲱⲧⲉⲃ ⲙⲡⲓⲥⲁⲣⲁⲡⲓⲇⲟⲥ ⲛⲧⲉϥⲱⲗⲓ ⲛⲧⲉϥⲙⲉⲧⲟⲩⲣⲟ ⲛⲧⲟⲧϥ ⲙⲙⲟⲛ ⲥⲉⲙⲛⲓ ⲛⲧⲉⲛⲉⲛϣⲏⲣⲓ ⲛⲓⲥⲙⲁⲏⲗ ⲁⲛ ϫⲉⲁⲗⲗⲁ ⲫⲁⲓ ⲡⲉ ⲡϫⲱⲕ ⲙⲡⲟⲩⲁⲣⲓⲑⲙⲟⲥ .
…
76 ⲙⲉⲛⲉⲛⲥⲁⲛⲁⲓ ϥⲛⲁⲧⲱⲛϥ ⲉϫⲱⲟⲩ ⲛϫⲉⲡⲟⲩⲣⲟ ⲛⲧⲉⲛⲓⲣⲱⲙⲉⲟⲥ ϥⲛⲁϯ ⲛⲟⲩϥⲱϯ ⲉⲃⲟⲗ ⲛⲱⲟⲩ ϧⲉⲛⲣⲱⲥ ⲛⲧⲥⲏϥⲓ ϧⲉⲛⲛⲉⲛϣⲏⲣⲓ ⲛⲓⲥⲙⲁⲏⲗ ϧⲉⲛⲡϣⲁϥⲉ ⲛⲧⲉⲑⲣⲓⲃⲱⲛ ⲡⲕⲁϩⲓ ⲛⲛⲟⲩⲓⲟϯ .
…
77 ⲛⲉⲛϣⲏⲣⲓ ⲛⲓⲥⲙⲁⲏⲗ ⲛⲁⲉⲣⲃⲱⲕ ⲛⲛⲓⲣⲱⲙⲉⲟⲥ ⲙⲡⲟⲩⲥⲏⲟⲩ ⲧⲏⲣϥ ⲛⲓⲣⲱⲙⲉⲟⲥ ⲛⲁⲉⲣϭⲥ ⲉⲭⲏⲙⲓ ⲛⲙ ⲛⲣⲟⲙⲡⲓ .
…
78 ⲙⲉⲛⲉⲛⲥⲁⲛⲁⲓ ⲉⲩⲉⲓ ⲉⲃⲟⲗ ⲛϫⲉⲛⲓⲉⲑⲛⲟⲥ ⲃ ⲉⲧⲉⲛⲁⲓ ⲛⲉ ⲛⲟⲩⲣⲁⲛ ⲅⲱⲅ ⲛⲉⲙⲁⲅⲱⲅ ⲉⲩⲉⲕⲓⲙ ⲉⲡⲕⲁϩⲓ ⲉϩⲁⲛⲙⲏϣ ⲛⲉϩⲟⲟⲩ .
…
79 ⲛⲁⲓ ⲉⲣⲉⲧⲟⲩⲏⲡⲓ ⲟϣ ⲙⲫⲣⲏϯ ⲙⲡⲓϣⲱ ⲟⲩⲟϩ ⲉϥⲉⲟⲩⲟⲛϩϥ ⲛϫⲉⲡⲓⲁⲛⲧⲓⲭⲣⲓⲥⲧⲟⲥ ⲉϥⲉⲉⲣϩⲁⲗ ⲛⲟⲩⲙⲏϣ ϩⲱⲥ ⲇⲉ ⲁϥϣⲁⲛϣϫⲉⲙϫⲟⲙ ⲛⲧⲉϥⲥⲱⲣⲉⲙ ⲛⲛⲓⲕⲉⲥⲱⲧⲡ .
…
80 ⲟⲩⲟϩ ϥⲛⲁϧⲱⲧⲉⲃ ⲙⲡⲓⲡⲣⲟⲫⲏⲧⲏⲥⲃ ⲉⲛⲱⲭ ⲛⲉⲙⲏⲗⲓⲁⲥ ⲛⲥⲉⲉⲣⲅ ⲛⲉϩⲟⲟⲩ ⲟⲩϫⲟⲥ ⲉⲩⲙⲱⲟⲩⲧ ϧⲉⲛⲡϣⲑⲉϩ ⲛϯⲛⲓϣϯ ⲙⲡⲟⲗⲓⲥ ϩⲓⲉⲣⲟⲩⲥⲁⲗⲏⲙ .
…
81 ⲙⲉⲛⲉⲛⲥⲱⲥ ⲛⲧⲉⲡⲓⲁⲡⲁⲥ ⲛⲧⲉⲛⲓⲉϩⲟⲟⲩ ⲧⲟⲩⲛⲟⲥⲟⲩ ⲉⲃⲟⲗ ϧⲉⲛⲛⲏⲉⲧⲙⲱⲟⲩⲧ .
…
82 ⲉⲧⲉⲫⲁⲓ ⲡⲉ ⲫⲏⲉⲧⲁⲓⲛⲁⲩ ⲉⲣⲟϥ ⲉϥⲛⲏⲟⲩ ⲛⲉⲙⲛⲓϭⲏⲡⲓ ⲛⲧⲉⲧⲫⲉ ⲙⲫⲣⲏϯ ⲛⲟⲩϣⲏⲣⲓ ⲛⲣⲱⲙⲓ ⲡⲉϥⲉⲣϣⲓϣⲓ ⲟⲩⲉⲣϣⲓϣⲓ ⲛⲉⲛⲉϩ ⲟⲩⲟϩ ⲧⲉϥⲙⲉⲧⲟⲩⲣⲟ ⲙⲡⲁⲥⲙⲟⲩⲛⲕ .
…
83 ⲟⲩⲟϩ ⲛⲑⲟϥ ⲉⲑⲛⲁϧⲱⲧⲉⲃ ⲙⲟⲩⲁⲛⲧⲓⲭⲣⲓⲥⲧⲟⲥ ⲛⲉⲙⲡⲉϥⲙⲏϣ ⲧⲏⲣϥ ⲉⲑⲛⲉⲙⲁϥ .
…
84 ⲁⲗⲏⲑⲱⲥ ⲟⲩⲟⲓ ⲙϯⲩⲭⲏ ⲛⲓⲃⲉⲛ ⲉⲧϣⲟⲡ ϩⲓϫⲉⲛⲡⲕⲁϩⲓ ⲙⲡⲓⲥⲏⲟⲩ ⲉⲧⲉⲙⲙⲁⲩ ϫⲉⲟⲩⲏⲓ ϥⲛⲁϣⲱⲡⲓ ⲛϫⲉⲟⲩϭⲓⲛϫⲟⲛⲥ ⲛⲉⲙⲟⲩⲛⲓϣϯ ⲛϧⲟⲙϧⲉⲙ ⲛⲉⲙⲟⲩⲣⲓⲙⲓ ⲟⲩⲟϩ ⲉⲣⲉⲡⲟⲩϫⲁⲓ ⲛⲛⲓⲣⲱⲙⲓ ϧⲉⲛⲛⲉⲛϫⲓϫ ⲙⲫⲛⲟⲩϯ ⲛⲧⲉⲧⲫⲉ ⲟⲩⲟϩ ⲫⲁⲓ ⲡⲉ ⲡϫⲱⲕ ⲙⲡⲓⲥⲁϫⲓ .
…
85 ⲡⲉϫⲉ ⲡⲓⲁⲅⲅⲉⲗⲟⲥ ⲛⲏⲓ ϫⲉⲇⲁⲛⲓⲏⲗ ⲇⲁⲛⲓⲏⲗ ⲙⲁϣⲑⲁⲙ ⲛⲛⲁⲓⲥⲁϫⲓ ⲁⲣⲓⲥⲫⲣⲁⲅⲓⲍⲓⲛ ⲙⲙⲱⲟⲩ ϣⲁⲡⲓⲥⲏⲟⲩ ⲉⲧⲟⲩⲛⲁϫⲱⲕ ⲉⲃⲟⲗ ϫⲉⲫⲁⲓ ⲡⲉ ⲡϫⲱⲕ ⲛϩⲱⲃ ⲛⲓⲃⲉⲛ .
…
86 ⲁⲛⲟⲕ ⲇⲁⲛⲓⲏⲗ ⲁⲓⲧⲱⲛⲧ ⲁⲓⲧⲱⲃ ⲛⲛⲓⲥⲁϫⲓ ⲟⲩⲟϩ ⲁⲓⲉⲣⲥⲫⲣⲁⲅⲓⲍⲓⲛ ⲙⲙⲱⲟⲩ .
…
87 ⲁⲓϯⲱⲟⲩ ⲙⲫⲛⲟⲩϯ ⲫⲓⲱⲧ ⲛⲧⲉⲟⲩⲟⲛ ⲛⲓⲃⲉⲛ ⲟⲩⲟϩ ⲫⲛⲏⲃ ⲛⲧⲉⲡⲓⲉⲡⲧⲏⲣϥ ⲟⲩⲟϩ ⲉⲧⲥⲱⲟⲩⲛ ⲛⲛⲓⲥⲏⲟⲩ ⲛⲉⲙⲛⲓⲭⲣⲟⲛⲟⲥ .
…
88 ⲫⲁⲓ ⲉⲧⲉⲫⲱϥ ⲡⲉ ⲡⲓⲱⲟⲩ ⲛⲉⲙⲡⲓⲁⲙⲁϩⲓ ϣⲁⲉⲛⲉϩ ⲁⲙⲏⲛ .
…