1 ⲛⲉ ⲟⲩⲟⲛ ⲟⲩⲣⲱⲙⲓ ⲇⲉ ⲉϥϣⲟⲡ ϧⲉⲛⲃⲁⲃⲩⲗⲱⲛ ⲉⲡⲉϥⲣⲁⲛ ⲡⲉ ⲓⲱⲁⲕⲓⲙ .
…
2 ⲁϥϭⲓ ⲇⲉ ⲛⲟⲩⲥϩⲓⲙⲓ ⲉⲡⲉⲥⲣⲁⲛ ⲡⲉ ⲥⲟⲩⲥⲁⲛⲛⲁ ⲧϣⲉⲣⲓ ⲛⲭⲁⲗⲕⲓⲁⲥ ⲛⲉ ⲉⲛⲁⲛⲉⲥ ⲉⲙⲁϣⲱ ⲡⲉ ⲟⲩⲟϩ ⲛⲁⲥⲉⲣϩⲟϯ ϧⲁⲧϩⲏ ⲙⲫⲛⲟⲩϯ .
…
3 ⲟⲩⲟϩ ⲛⲉⲥⲓⲟϯ ⲛⲉ ϩⲁⲛⲑⲙⲏⲓ ⲛⲉ ⲟⲩⲟϩ ⲛⲁⲩϯⲥⲃⲱ ⲛⲧⲟⲩϣⲉⲣⲓ ⲕⲁⲧⲁⲫⲛⲟⲙⲟⲥ ⲙⲙⲱⲩⲥⲏⲥ ⲡⲉ .
…
4 ⲓⲱⲁⲕⲓⲙ ⲇⲉ ⲛⲉ ⲟⲩⲣⲁⲙⲁⲟ ⲡⲉ ⲉⲙⲁϣⲱ ⲛⲉ ⲟⲩⲟⲛⲧⲁϥ ⲙⲙⲁⲩ ⲛⲟⲩⲡⲁⲣⲁⲇⲓⲥⲟⲥ ⲉϥⲭⲏ ϧⲁⲑⲟⲩⲟϥ ⲙⲡⲉϥⲏⲓ ⲟⲩⲟϩ ⲛⲁⲩⲛⲏⲟⲩ ϩⲁⲣⲟϥ ⲧⲏⲣⲟⲩ ⲛϫⲉⲛⲓⲓⲟⲩⲇⲁⲓ ⲉⲑⲃⲉϫⲉⲛⲑⲟϥ ⲛⲁϥⲧⲁⲓⲏⲟⲩⲧ ⲉϩⲟⲧⲉ ⲉⲣⲱⲟⲩ ⲧⲏⲣⲟⲩ .
…
5 ⲁⲩⲟⲩⲱⲛϩ ⲇⲉ ⲉⲃⲟⲗ ⲛϫⲉⲡⲣⲉⲥⲃⲩⲧⲉⲣⲟⲥⲃ ⲛⲣⲉϥϯϩⲁⲡ ⲉⲃⲟⲗϧⲉⲛ ⲡⲓⲗⲁⲟⲥ ϧⲉⲛϯⲣⲟⲙⲡⲓ ⲉⲧⲉⲙⲙⲁⲩ ⲛⲏⲉⲧⲁϥⲥⲁϫⲓ ⲉⲑⲃⲏⲧⲟⲩ ⲛϫⲉⲡⲉⲛⲛⲏⲃ ϫⲉⲁⲥⲓ ⲛϫⲉⲟⲩⲁⲛⲟⲙⲓⲁ ⲉⲃⲟⲗϧⲉⲛ ⲃⲁⲃⲩⲗⲱⲛ ⲉⲃⲟⲗϧⲉⲛ ϩⲁⲛⲡⲣⲉⲥⲃⲩⲧⲉⲣⲟⲥ ⲛⲕⲣⲓⲧⲏⲥ ⲛⲁⲓ ⲉⲛⲁⲩⲙⲉⲩⲓ ⲉⲣⲱⲟⲩ ϫⲉⲥⲉⲉⲣϩⲉⲙⲓ ⲙⲡⲓⲗⲁⲟⲥ .
…
6 ⲟⲩⲟϩ ⲛⲁⲓ ⲉϣⲁⲩⲑⲱⲟⲩϯ ⲉⲡⲏⲓ ⲛⲓⲱⲁⲕⲓⲙ ⲟⲩⲟϩ ⲛⲁⲩⲑⲱⲟⲩϯ ϩⲁⲣⲱⲟⲩ ⲡⲉ ⲛϫⲉⲟⲩⲟⲛ ⲛⲓⲃⲉⲛ ⲉⲑϭⲓϩⲁⲡ .
…
7 ⲉϣⲱⲡ ⲁϥϣⲁⲛⲙⲟϣⲓ ⲛϫⲉⲡⲓⲗⲁⲟⲥ ϧⲉⲛⲧⲫⲁϣⲓ ⲙⲡⲓⲉϩⲟⲟⲩ ϣⲁⲥⲓ ⲉϧⲟⲩⲛ ⲛϫⲉⲥⲟⲩⲥⲁⲛⲛⲁ ⲉⲥⲙⲟϣⲓ ϧⲉⲛⲡⲓⲡⲁⲣⲁⲇⲓⲥⲟⲥ ⲛⲧⲉⲡⲉⲥϩⲁⲓ .
…
8 ⲛⲁⲩϯⲛⲓⲁⲧⲟⲩ ⲙⲙⲟⲥ ⲙⲙⲏⲛⲓ ⲡⲉ ⲛϫⲉⲛⲓⲡⲣⲉⲥⲃⲩⲧⲉⲣⲟⲥ ⲉⲥⲛⲏⲟⲩ ⲉϧⲟⲩⲛ ⲉⲥⲙⲟϣⲓ ϧⲉⲛⲡⲓⲡⲁⲣⲁⲇⲓⲥⲟⲥ ⲁⲩϣⲱⲡⲓ ϧⲉⲛⲧⲉⲥⲉⲡⲓⲑⲩⲙⲓⲁ .
…
9 ⲁⲩⲫⲱⲛϩ ⲙⲡⲟⲩϩⲏⲧ ⲟⲩⲟϩ ⲙⲁϣⲑⲁⲙ ⲛⲛⲟⲩⲃⲁⲗ ⲉϣⲧⲉⲙϫⲟⲩϣⲧ ⲉⲡϣⲱⲓ ⲉⲧⲫⲉ ⲟⲩⲇⲉ ⲉϣⲧⲉⲙⲉⲣⲫⲙⲉⲩⲓ ⲉϩⲁⲛϩⲁⲡ ⲛⲧⲙⲏⲓ .
…
10 ⲟⲩⲟϩ ⲛⲑⲱⲟⲩ ⲙⲡⲃ ⲛⲁⲣⲉⲡⲟⲩϩⲏⲧ ⲙⲉⲩⲓ ⲉⲣⲟⲥ ⲡⲉ ⲟⲩⲟϩ ⲛⲁⲩⲟⲩⲱⲛϩ ⲙⲡⲟⲩⲙⲕⲁϩ ⲁⲛ ⲡⲉ ⲉⲛⲟⲩⲉⲣⲏⲟⲩ .
…
11 ϫⲉⲟⲩⲏⲓ ⲛⲁⲩϣⲓⲡⲓ ⲡⲉ ⲉⲟⲩⲱⲛϩ ⲛⲧⲟⲩⲉⲡⲓⲑⲩⲙⲓⲁ ⲉⲃⲟⲗ ⲉⲑⲃⲉϫⲉⲛⲁⲩⲟⲩⲱϣ ⲉϣⲱⲡⲓ ⲛⲉⲙⲁⲥ ⲙⲡⲃ ⲡⲉ .
…
12 ⲟⲩⲟϩ ⲛⲁⲩϯϩⲑⲏⲟⲩ ⲙⲙⲏⲛⲓ ϧⲉⲛⲟⲩⲙⲉⲓ ⲉⲩⲟⲩⲱϣ ⲉⲛⲁⲩ ⲉⲣⲟⲥ ⲡⲉϫⲱⲟⲩ ⲇⲉ ⲛⲛⲟⲩⲉⲣⲏⲟⲩ .
…
13 ϫⲉⲙⲁⲣⲉⲛϣⲉⲛⲁⲛ ⲉⲡⲉⲛⲏⲓ ϫⲉⲟⲩⲏⲓ ⲫⲛⲁⲩ ⲛⲟⲩⲱⲙ ⲡⲟⲩⲟϩ ⲉⲧⲁⲩⲓ ⲉⲃⲟⲗ ⲁⲩⲫⲱⲣϫ ⲉⲃⲟⲗ ⲛⲛⲟⲩⲉⲣⲏⲟⲩ .
…
14 ⲉⲧⲁⲩⲧⲁⲥⲑⲟ ⲁⲩⲓ ⲉⲟⲩⲙⲁ ⲉⲩⲥⲟⲡ ⲟⲩⲟϩ ⲛⲁⲩϣⲓⲛⲓ ⲛⲛⲟⲩⲉⲣⲏⲟⲩ ⲛϯⲉⲧⲓⲁ ⲟⲩⲟϩ ⲁⲩⲟⲩⲱⲛϩ ⲛⲧⲟⲩⲉⲡⲓⲑⲩⲙⲓⲁ ⲛⲛⲟⲩⲉⲣⲏⲟⲩ ⲧⲟⲧⲉ ⲁⲩϯⲛⲉⲓ ⲉⲩⲥⲟⲡ ⲉⲑⲃⲉⲟⲩⲥⲏⲟⲩ ⲉⲩⲛⲁϫⲉⲙⲥ ⲙⲙⲁⲩⲁⲧⲥ .
…
15 ⲁⲥϣⲱⲡⲓ ⲉⲡϫⲓⲛⲧⲟⲩϯ ⲛϩⲑⲏⲟⲩ ⲉⲟⲩⲉϩⲟⲟⲩ ⲉϥϩⲟⲩⲣⲱⲟⲩ ⲁⲥⲓ ⲉϧⲟⲩⲛ ⲛϫⲉⲥⲟⲩⲥⲁⲛⲛⲁ ⲙⲫⲣⲏϯ ⲛⲥⲁϥ ⲛⲉⲙⲅ ⲙⲫⲟⲟⲩ ⲉϧⲟⲩⲛ ⲉⲡⲓⲡⲁⲣⲁⲇⲓⲥⲟⲥ ⲛⲉⲙⲁⲗⲟⲩ ⲥⲛⲟⲩϯ ⲛⲧⲁⲥ ⲙⲙⲁⲩⲁⲧⲟⲩ ⲟⲩⲟϩ ⲛⲁⲥⲉⲣⲉⲡⲓⲑⲩⲙⲓⲛ ⲉϫⲱⲕⲉⲙ ϧⲉⲛⲡⲓⲡⲁⲣⲁⲇⲓⲥⲟⲥ ϫⲉⲟⲩⲏⲓ ⲛⲉ ⲡⲕⲁⲩⲙⲁ ⲡⲉ .
…
16 ⲟⲩⲟϩ ⲛⲉ ⲙⲙⲟⲛ ϩⲗⲓ ⲙⲙⲁⲩ ⲡⲉ ⲉⲃⲏⲗ ⲉⲡⲓⲡⲣⲉⲥⲃⲩⲧⲉⲣⲟⲥⲃ ⲉⲩⲭⲏⲡ ⲟⲩⲟϩ ⲛⲁⲩϯⲛⲓⲁⲧⲟⲩ ⲛⲁⲥ ⲡⲉ .
…
17 ⲡⲉϫⲁⲥ ⲛⲛⲉⲥⲁⲗⲱⲟⲩⲓ ϫⲉⲁⲛⲟⲩⲓ ⲛⲏⲓ ⲛⲟⲩⲛⲉϩ ⲛⲉⲙⲟⲩⲥⲙⲏⲙⲁ ⲟⲩⲟϩ ⲛⲓⲣⲱⲟⲩ ⲛⲧⲉⲡⲓⲡⲁⲣⲁⲇⲓⲥⲟⲥ ⲙⲁϣⲑⲁⲙ ⲙⲙⲱⲟⲩ ϩⲓⲛⲁ ⲛⲧⲁϫⲱⲕⲉⲙ .
…
18 ⲟⲩⲟϩ ⲁⲩⲓⲣⲓ ⲕⲁⲧⲁⲫⲣⲏϯ ⲉⲧⲁⲥϫⲟⲥ ⲁⲩⲙⲁϣⲑⲁⲙ ⲛⲛⲓⲣⲱⲟⲩ ⲛⲧⲉⲡⲓⲡⲁⲣⲁⲇⲓⲥⲟⲥ ⲁⲩⲓ ⲉⲃⲟⲗ ϧⲉⲛⲡⲓⲣⲟ ⲥⲁⲧⲟⲧⲟⲩ ⲉⲓⲛⲓ ⲛⲛⲏⲉⲧⲁⲥⲟⲩⲁϩⲥⲁϩⲛⲓ ⲙⲙⲱⲟⲩ ⲛⲱⲟⲩ ⲟⲩⲟϩ ⲙⲡⲟⲩⲛⲁⲩ ⲉⲡⲓⲡⲣⲉⲥⲃⲩⲧⲉⲣⲟⲥ ⲃ ϫⲉⲟⲩⲏⲓ ⲛⲁⲩⲭⲏⲡ ⲡⲉ .
…
19 ⲁⲥϣⲱⲡⲓ ⲉⲧⲁⲩⲓ ⲉⲃⲟⲗ ⲛϫⲉⲛⲓⲁⲗⲱⲟⲩⲓ ⲁⲩⲧⲱⲟⲩⲛⲟⲩ ⲛϫⲉⲡⲓⲡⲣⲉⲥⲃⲩⲧⲉⲣⲟⲥⲃ ⲁⲩϭⲟϫⲓ ϩⲁⲣⲟⲥ ⲟⲩⲟϩ ⲡⲉϫⲱⲟⲩ ⲛⲁⲥ .
…
20 ϫⲉϩⲏⲡⲡⲉ ⲓⲥ ⲛⲓⲣⲱⲟⲩ ⲛⲧⲉⲡⲓⲡⲁⲣⲁⲇⲓⲥⲟⲥ ⲥⲉϣⲟⲧⲉⲙ ⲟⲩⲟϩ ⲙⲙⲟⲛ ϩⲗⲓ ⲛⲁⲩ ⲉⲣⲟⲛ ⲧⲉⲛ ⲉϧⲣⲏⲓ ϧⲉⲛⲧⲉⲛⲉⲡⲓⲑⲩⲙⲓⲁ ϯⲛⲟⲩ ϫⲉⲙⲁⲧⲟϯ ⲛⲁⲛ ϣⲱⲡⲓ ⲛⲉⲙⲁⲛ .
…
21 ⲙⲙⲟⲛ ⲧⲉⲛⲛⲁⲉⲣⲙⲉⲑⲣⲉ ϧⲁⲣⲟ ϫⲉⲛⲁϥϣⲟⲡ ⲛⲉⲙⲉ ⲛϫⲉⲟⲩϧⲉⲗϣⲓⲣⲓ ⲉⲑⲃⲉⲫⲁⲓ ⲁⲣⲉⲟⲩⲱⲣⲡ ⲛⲛⲓⲁⲗⲱⲟⲩⲓ ⲉⲃⲟⲗϩⲁⲣⲟ .
…
22 ⲁⲥϥⲓⲁϩⲟⲙ ⲛϫⲉⲥⲟⲩⲥⲁⲛⲛⲁ ⲟⲩⲟϩ ⲡⲉϫⲁⲥ ϫⲉϯϩⲉϫϩⲱϫ ⲙⲫⲟⲟⲩ ⲥⲁⲥⲁ ⲛⲓⲃⲉⲛ ⲉϣⲱⲡ ⲁⲓϣⲁⲛⲉⲣ ⲫⲁⲓ ⲟⲩⲙⲟⲩ ⲛⲏⲓ ⲡⲉ ⲉϣⲱⲡ ⲁⲓϣⲧⲉⲙⲁⲓϥ ⲟⲛ ϯⲛⲁϣⲫⲱⲧ ⲁⲛ ⲉⲃⲟⲗϧⲉⲛ ⲛⲉⲧⲉⲛϫⲓϫ .
…
23 ⲁⲗⲗⲁ ⲛⲁⲛⲉⲥ ⲛⲏⲓ ⲉϣⲧⲉⲙⲁⲓϥ ⲉⲣⲁⲟⲩⲱ ϧⲉⲛⲛⲉⲧⲉⲛϫⲓϫ ⲉϩⲟⲧⲉ ⲉⲣⲛⲟⲃⲓ ⲙⲡⲉⲙⲑⲟ ⲙⲫⲛⲟⲩϯ ⲛⲧⲉⲧⲫⲉ .
…
24 ⲁⲥⲱϣ ⲉⲡϣⲱⲓ ⲛϫⲉⲥⲟⲩⲥⲁⲛⲛⲁ ϧⲉⲛⲟⲩⲛⲓϣϯ ⲛⲥⲙⲏ ⲁⲩⲱϣ ⲉⲃⲟⲗ ϩⲱⲟⲩ ⲛϫⲉⲡⲓⲡⲣⲉⲥⲃⲩⲧⲉⲣⲟⲥⲃ ⲙⲡⲉⲥⲙⲑⲟ .
…
25 ⲟⲩⲟϩ ⲉⲧⲁϥϭⲟϫⲓ ⲛϫⲉⲟⲩⲁⲓ ⲙⲙⲱⲟⲩ ⲁϥⲟⲩⲱⲛ ⲛⲛⲓⲣⲱⲟⲩ ⲛⲧⲉⲡⲓⲡⲁⲣⲁⲇⲓⲥⲟⲥ .
…
26 ϩⲱⲥ ⲇⲉ ⲉⲧⲁⲩⲥⲱⲧⲉⲙ ⲉⲡⲓϧⲣⲱⲟⲩ ϧⲉⲛⲡⲓⲡⲁⲣⲁⲇⲓⲥⲟⲥ ⲛϫⲉⲛⲁⲡⲉⲥⲏⲓ ⲁⲩϣⲉⲛⲱⲟⲩ ⲥⲁⲧⲟⲧⲟⲩ ⲉⲛⲁⲩ ϫⲉⲟⲩ ⲡⲉ ⲉⲧⲁϥϣⲱⲡⲓ ⲙⲙⲟⲥ .
…
27 ⲁⲥϣⲱⲡⲓ ⲇⲉ ⲉⲧⲁ ⲛⲓⲡⲣⲉⲥⲃⲩⲧⲉⲣⲟⲥ ϫⲉⲛⲟⲩⲥⲁϫⲓ ⲁⲩϣⲫⲓⲧ ⲛϫⲉⲛⲓⲉⲃⲓⲁⲓⲕ ⲉⲙⲁϣⲱ ϫⲉⲙⲡⲟⲩϫⲉⲙ ⲟⲩⲥⲁϫⲓ ⲙⲡⲁⲓⲣⲏϯ ⲉⲛⲉϩ ϧⲁⲥⲟⲩⲥⲁⲛⲛⲁ .
…
28 ⲁⲥϣⲱⲡⲓ ⲇⲉ ⲉⲡⲉϥⲣⲁⲥϯ ⲉⲧⲁϥⲓ ⲛϫⲉⲡⲓⲗⲁⲟⲥ ϩⲁⲓⲱⲁⲕⲓⲙ ⲡⲉⲥϩⲁⲓ ⲁⲩⲓ ϩⲱⲟⲩ ⲛϫⲉⲡⲓⲡⲣⲉⲥⲃⲩⲧⲉⲣⲟⲥⲃ ⲉⲩⲙⲉϩ ⲙⲙⲉⲩⲓ ⲛⲁⲛⲟⲙⲓⲁ ϧⲁⲥⲟⲩⲥⲁⲛⲛⲁ ⲉⲡϫⲓⲛϧⲟⲑⲃⲉⲥ .
…
29 ⲟⲩⲟϩ ⲡⲉϫⲱⲟⲩ ⲙⲡⲉⲙⲑⲟ ⲙⲡⲓⲗⲁⲟⲥ ϫⲉⲟⲩⲱⲣⲡ ⲛⲥⲁⲥⲟⲩⲥⲁⲛⲛⲁ ⲧϣⲉⲣⲓ ⲛⲭⲁⲗⲕⲓⲁⲥ ⲧⲥϩⲓⲙⲓ ⲛⲓⲱⲁⲕⲓⲙ ⲛⲑⲱⲟⲩ ⲇⲉ ⲁⲩⲟⲩⲱⲣⲡ .
…
30 ⲁⲥⲓ ⲛϫⲉⲥⲟⲩⲥⲁⲛⲛⲁ ⲛⲉⲙⲛⲉⲥⲓⲟϯ ⲛⲉⲙⲛⲉⲥϣⲏⲣⲓ ⲛⲉⲙⲛⲉⲥⲥⲩⲅⲅⲉⲛⲏⲥ ⲧⲏⲣⲟⲩ .
…
31 ⲥⲟⲩⲥⲁⲛⲛⲁ ⲇⲉ ⲛⲉ ⲟⲩⲥⲁⲓⲏ ⲧⲉ ϧⲉⲛⲡⲉⲥⲥⲙⲟⲧ ⲟⲩⲟϩ ⲉⲛⲁⲛⲉⲥ ⲉⲙⲁϣⲱ ⲧⲉ .
…
32 ⲛⲓⲡⲁⲣⲁⲛⲟⲙⲟⲥ ⲇⲉ ⲁⲩⲉⲣⲕⲉⲗⲉⲩⲓⲛ ⲉⲟⲩⲃⲁϣ ϫⲱⲥ ⲉⲃⲟⲗ ⲛⲁⲣⲉϫⲱⲥ ⲅⲁⲣ ϩⲟⲃⲥ ⲡⲉ ϩⲟⲡⲱⲥ ⲛⲧⲟⲩⲥⲓ ⲙⲡⲉⲥⲥⲁⲓ .
…
33 ⲛⲁⲩⲣⲓⲙⲓ ⲧⲏⲣⲟⲩ ⲡⲉ ⲛϫⲉⲛⲏⲉⲑⲛⲁⲩ ⲉⲣⲟⲥ ⲛⲉⲙⲛⲏⲉⲧⲏⲡ ⲉⲣⲟⲥ ⲧⲏⲣⲟⲩ .
…
34 ⲁⲩⲧⲱⲟⲩⲛⲟⲩ ⲛϫⲉⲛⲓⲡⲣⲉⲥⲃⲩⲧⲉⲣⲟⲥ ϧⲉⲛⲧⲙⲏϯ ⲙⲡⲓⲗⲁⲟⲥ ⲁⲩⲭⲏ ⲛⲛⲟⲩϫⲓϫ ⲉϩⲣⲏⲓ ⲉϫⲉⲛⲧⲉⲥⲁⲫⲉ .
…
35 ⲛⲑⲟⲥ ⲇⲉ ⲁⲥⲣⲓⲙⲓ ⲁⲥϫⲟⲩϣⲧ ⲉϩⲣⲏⲓ ⲉⲧⲫⲉ ϫⲉⲟⲩⲏⲓ ⲡⲉⲥϩⲏⲧ ⲟⲩⲉϩ ⲉⲫⲛⲟⲩϯ ⲡⲉ .
…
36 ⲡⲉϫⲱⲟⲩ ⲇⲉ ⲛϫⲉⲛⲓⲡⲣⲉⲥⲃⲩⲧⲉⲣⲟⲥ ϫⲉⲉⲛⲁⲛⲙⲟϣⲓ ⲙⲙⲁⲩⲁⲧⲉⲛ ⲡⲉ ϧⲉⲛⲡⲓⲡⲁⲣⲁⲇⲓⲥⲟⲥ ⲁⲥⲓ ⲉϧⲟⲩⲛ ⲛϫⲉⲑⲁⲓ ⲛⲉⲙⲃⲱⲕⲓ ⲥⲛⲟⲩϯ ⲁⲥⲟⲩⲱⲣⲡ ⲛⲛⲓⲃⲱⲕⲓ ⲉⲃⲟⲗ ⲟⲩⲟϩ ⲁⲩⲙⲁϣⲑⲁⲙ ⲛⲛⲓⲣⲱⲟⲩ ⲛⲧⲉⲡⲓⲡⲁⲣⲁⲇⲓⲥⲟⲥ .
…
37 ⲁϥⲓ ϩⲁⲣⲟⲥ ⲛϫⲉⲟⲩϧⲉⲗϣⲓⲣⲓ ⲉϥⲭⲏⲡ ϧⲉⲛⲡⲓⲡⲁⲣⲁⲇⲓⲥⲟⲥ ⲁϥⲛⲕⲟⲧ ⲛⲉⲙⲁⲥ .
…
38 ⲁⲛⲟⲛ ⲇⲉ ⲉⲛⲭⲏⲡ ϧⲉⲛϯⲉⲗⲕⲥ ⲛⲧⲉⲡⲓⲡⲁⲣⲁⲇⲓⲥⲟⲥ ⲉⲧⲁⲛⲛⲁⲩ ⲉϯⲁⲛⲟⲙⲓⲁ ⲁⲛϭⲟϫⲓ ⲉϩⲣⲏⲓ ⲉϫⲱⲟⲩ ⲁⲛⲛⲁⲩ ⲉⲣⲱⲟⲩ ⲉⲩϣⲟⲡ ⲛⲉⲙⲛⲟⲩⲉⲣⲏⲟⲩ .
…
39 ⲫⲏ ⲙⲉⲛ ⲙⲡⲉⲛϣϫⲉⲙϫⲟⲙ ⲉⲁⲙⲁϩⲓ ⲙⲙⲟϥ ⲉⲑⲃⲉϫⲉⲛⲁϥϫⲟⲣ ⲉϩⲟⲧⲉⲣⲟⲛ ⲟⲩⲟϩ ⲁϥⲟⲩⲱⲛ ⲛⲛⲓⲣⲱⲟⲩ ⲁϥⲫⲱⲧ ⲁϥϣⲉⲛⲁϥ .
…
40 ⲑⲁⲓ ⲇⲉ ⲁⲛⲁⲙⲟⲛⲓ ⲙⲙⲟⲥ ⲁⲛϣⲉⲛⲥ ϫⲉⲛⲓⲙ ⲡⲉ ⲡⲁⲓϧⲉⲗϣⲓⲣⲓ ⲟⲩⲟϩ ⲙⲡⲉⲥⲟⲩⲱϣ ⲉⲧⲁⲙⲟⲛ ⲛⲁⲓ ⲅⲁⲣ ⲧⲉⲛⲉⲣⲙⲉⲑⲣⲉ ⲙⲙⲱⲟⲩ ⲁⲛⲟⲛ .
…
41 ⲟⲩⲟϩ ⲁⲥⲧⲉⲛϩⲟⲩⲧⲟⲩ ⲛϫⲉϯⲥⲩⲛⲁⲅⲱⲅⲏ ⲧⲏⲣⲥ ϩⲱⲥ ϩⲁⲛⲡⲣⲉⲥⲃⲩⲧⲉⲣⲟⲥ ⲛⲉ ⲟⲩⲟϩ ϩⲁⲛⲕⲣⲓⲧⲏⲥ ⲛⲧⲉⲡⲓⲗⲁⲟⲥ ⲁⲩϯϩⲁⲡ ⲉⲣⲟⲥ ⲉⲑⲣⲉⲥⲙⲟⲩ .
…
42 ⲁⲥⲱϣ ⲉⲡϣⲱⲓ ⲛϫⲉⲥⲟⲩⲥⲁⲛⲛⲁ ϧⲉⲛⲟⲩⲛⲓϣϯ ⲛⲥⲙⲏ ⲟⲩⲟϩ ⲡⲉϫⲁⲥ ϫⲉⲫϯ ⲡⲓϣⲁⲉⲛⲉϩ ⲫⲏⲉⲧⲥⲱⲟⲩⲛ ⲛⲛⲏⲉⲧϩⲏⲡ ⲫⲏⲉⲧⲥⲱⲟⲩⲛ ⲛϩⲱⲃ ⲛⲓⲃⲉⲛ ⲙⲡⲁⲧⲟⲩϣⲱⲡⲓ .
…
43 ⲛⲑⲟⲕ ⲉⲧⲥⲱⲟⲩⲛ ⲱ ⲡϭⲟⲉⲓⲥ ϫⲉⲉⲣⲉⲛⲁⲓ ⲉⲣⲙⲉⲑⲣⲉ ⲛⲛⲟⲩϫ ϧⲁⲣⲟⲓ ϩⲏⲡⲡⲉ ϯⲛⲁⲙⲟⲩ ⲙⲡⲓⲉⲣ ϩⲗⲓ ⲛⲛⲟⲃⲓ ⲛⲛⲏⲉⲧⲉ ⲛⲁⲓ ⲙⲉⲩⲓ ⲉⲣⲟⲓ ⲙⲙⲱⲟⲩ .
…
44 ⲁϥⲥⲱⲧⲉⲙ ⲛϫⲉⲡϭⲟⲉⲓⲥ ⲉⲧⲉⲥⲥⲙⲏ .
…
45 ⲉⲩⲱⲗⲓ ⲙⲙⲟⲥ ⲉⲃⲟⲗ ⲉⲧⲁⲕⲟⲥ ⲁ ⲫⲛⲟⲩϯ ⲧⲟⲩⲛⲟⲥ ⲟⲩⲡⲛⲁ ⲉϥⲟⲩⲁⲃ ϧⲉⲛⲟⲩⲁⲗⲟⲩ ⲙⲃⲉⲣⲓ ⲉⲡⲉϥⲣⲁⲛ ⲡⲉ ⲇⲁⲛⲓⲏⲗ .
…
46 ⲁϥⲱϣ ⲉⲃⲟⲗ ϧⲉⲛⲟⲩⲛⲓϣϯ ⲛϧⲣⲱⲟⲩ ϫⲉϯⲟⲩⲁⲃ ⲁⲛⲟⲕ ⲉⲃⲟⲗϩⲁ ⲡⲥⲛⲟϥ ⲛⲧⲉⲧⲁⲓⲥϩⲓⲙⲓ .
…
47 ⲁϥⲧⲁⲥⲑⲟ ⲛϫⲉⲡⲓⲗⲁⲟⲥ ⲧⲏⲣϥ ϩⲁⲣⲟϥ ⲟⲩⲟϩ ⲡⲉϫⲱⲟⲩ ϫⲉⲡⲁⲓⲥⲁϫⲓ ⲟⲩ ⲡⲉ ⲉⲧⲁⲕϫⲟϥ ⲛⲑⲟⲕ .
…
48 ⲛⲑⲟϥ ⲇⲉ ⲁϥⲟϩⲓ ⲉⲣⲁⲧϥ ϧⲉⲛⲧⲟⲩϩⲙⲏϯ ⲡⲉϫⲁϥ ϫⲉⲡⲁⲓⲣⲏϯ ⲛⲑⲱⲧⲉⲛ ϩⲁⲛⲥⲟϫ ϧⲁⲛⲉⲛϣⲏⲣⲓ ⲙⲡⲓⲥⲗ ϫⲉⲙⲡⲉⲧⲉⲛϧⲟⲧⲱⲉⲧ ⲟⲩⲇⲉ ϯⲙⲉⲧⲥⲁⲃⲉ ⲙⲡⲉⲧⲉⲛⲥⲟⲩⲱⲛⲥ ⲁⲣⲉⲧⲉⲛϩⲓ ⲧϣⲉⲣⲓ ⲙⲡⲓⲥⲗ ⲉⲡϩⲁⲡ .
…
49 ⲁⲗⲗⲁ ⲙⲁⲧⲁⲥⲑⲟ ⲉⲡⲓⲙⲁⲛϯϩⲁⲡ ⲉⲧⲁ ⲛⲁⲓ ⲅⲁⲣ ⲉⲣⲙⲉⲑⲣⲉ ⲛⲛⲟⲩϫ ϧⲁⲣⲟⲥ .
…
50 ⲁϥⲧⲁⲥⲑⲟ ⲛϫⲉⲡⲓⲗⲁⲟⲥ ϧⲉⲛⲟⲩⲓⲏⲥⲟⲩⲥ ⲡⲉϫⲱⲟⲩ ⲛⲁϥ ⲛϫⲉⲛⲓⲡⲣⲉⲥⲃⲩⲧⲉⲣⲟⲥ ϫⲉⲁⲙⲟⲩ ϩⲉⲙⲥⲓ ϧⲉⲛⲧⲉⲛⲙⲏϯ ⲟⲩⲟϩ ⲙⲁⲧⲁⲙⲟⲛ ϫⲉⲛⲑⲟⲕ ⲁ ⲫⲛⲟⲩϯ ϯ ⲛⲁⲕ ⲙⲡⲓⲡⲣⲉⲥⲃⲩⲧⲏⲣⲓⲟⲛ .
…
51 ⲟⲩⲟϩ ⲡⲉϫⲉ ⲇⲁⲛⲓⲏⲗ ϫⲉⲫⲟⲣϫⲟⲩ ⲉⲃⲟⲗ ⲉⲛⲟⲩⲉⲣⲏⲟⲩ ϩⲓⲛⲁ ⲛⲧⲁⲉⲣⲁⲛⲁⲕⲣⲓⲛⲓⲛ ⲙⲙⲱⲟⲩ .
…
52 ϩⲱⲥ ⲇⲉ ⲉⲧⲁⲩⲫⲟⲣϫⲟⲩ ⲉⲃⲟⲗ ⲛⲛⲟⲩⲉⲣⲏⲟⲩ ⲁϥⲙⲟⲩϯ ⲉⲟⲩⲁⲓ ⲙⲙⲱⲟⲩ ⲡⲉϫⲁϥ ⲛⲁϥ ϫⲉⲫⲏⲉⲧⲁϥⲉⲣⲁⲡⲁⲥ ϧⲉⲛⲛⲉϥⲉϩⲟⲟⲩ ⲉⲧϩⲱⲟⲩ ϯⲛⲟⲩ ⲁⲩⲓ ⲉϫⲱⲕ ⲛϫⲉⲛⲉⲕⲛⲟⲃⲓ ⲛⲏⲉⲛⲁⲕⲓⲣⲓ ⲙⲙⲱⲟⲩ ⲛϣⲟⲣⲡ .
…
53 ⲉⲕϯϩⲁⲡ ϧⲉⲛϩⲁⲛϩⲁⲡ ⲛⲟϫⲓ ⲛⲓⲁⲑⲛⲟⲃⲓ ⲉⲕϩⲓⲟⲩⲓ ⲙⲙⲱⲟⲩ ⲉⲡϩⲁⲡ ⲟⲩⲟϩ ⲛⲏⲉⲧⲉⲣⲛⲟⲃⲓ ⲉⲕⲭⲱ ⲙⲙⲱⲟⲩ ⲉⲃⲟⲗ ⲉϥϫⲱ ⲙⲙⲟⲥ ⲛϫⲉⲡϭⲟⲉⲓⲥ ϫⲉⲟⲩⲁⲧⲛⲟⲃⲓ ⲛⲉⲙⲟⲩⲑⲙⲏⲓ ⲛⲛⲉⲕϧⲟⲑⲃⲟⲩ .
…
54 ϯⲛⲟⲩ ⲟⲩⲛ ⲓⲥϫⲉ ⲁⲕⲛⲁⲩ ⲉⲑⲁⲓ ⲁϫⲟⲥ ⲛⲏⲓ ϫⲉⲉⲧⲁⲕⲧⲁϩⲱⲟⲩ ⲉⲩⲥⲁϫⲓ ⲛⲉⲙⲛⲟⲩⲉⲣⲏⲟⲩ ϧⲁⲧⲉⲛⲁϣ ⲛϣϣⲏⲛ ⲛⲑⲟϥ ⲡⲉϫⲁϥ ϫⲉϧⲁⲣⲁⲧϥ ⲛⲟⲩⲥⲭⲓⲛⲟⲛ .
…
55 ⲡⲉϫⲉ ⲇⲁⲛⲓⲏⲗ ϫⲉϧⲉⲛⲟⲩⲥⲱⲟⲩⲧⲉⲛ ⲁⲕϫⲉⲙⲉⲑⲛⲟⲩϫ ⲟⲩⲟϩ ⲡⲉⲕⲥⲁⲙⲉⲑⲛⲟⲩϫ ϩⲓϫⲉⲛⲧⲉⲕⲁⲫⲉ ϩⲏⲡⲡⲉ ⲓⲥ ⲡⲓⲁⲅⲅⲉⲗⲟⲥ ⲛⲧⲉⲡϭⲥ ⲁϥϭⲓ ⲙⲡϣⲓⲛⲓ ⲉⲃⲟⲗϩⲓⲧⲟⲧϥ ⲙⲫⲛⲟⲩϯ ⲉϥⲉⲫⲟⲣϫⲕ ⲉⲃⲟⲗ ϧⲉⲛⲧⲉⲕⲙⲏϯ .
…
56 ⲟⲩⲟϩ ϩⲟⲧⲉ ⲉⲧⲁⲩⲟⲩⲟⲑⲃⲉϥ ⲉⲃⲟⲗ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲓⲛⲓ ⲛⲁϥ ⲙⲡⲓⲭⲉⲧ ⲡⲉϫⲁϥ ⲛⲁϥ ϫⲉⲡⲓϫⲣⲟϫ ⲛⲭⲁⲛⲁⲁⲛ ⲟⲩⲟϩ ⲫⲁ ⲓⲟⲩⲇⲁ ⲁⲛ ⲁ ⲡⲓⲥⲁϫⲓ ⲉⲣϩⲁⲗ ⲙⲙⲟⲕ ⲟⲩⲟϩ ⲁ ϯⲉⲡⲓⲑⲩⲙⲓⲁ ⲑⲱⲙ ⲙⲡⲉⲕϩⲏⲧ .
…
57 ⲡⲁⲓⲣⲏϯ ⲛⲁⲣⲉⲧⲉⲛⲣⲁ ⲙⲙⲟⲥ ⲛⲛⲉⲛϣⲉⲣⲓ ⲙⲡⲓⲥⲗ ⲛⲏⲉⲛⲁⲩⲉⲣϩⲟϯ ⲛⲁⲩⲥⲁϫⲓ ⲛⲉⲙⲱⲧⲉⲛ ⲁⲛ ⲡⲉ ⲁⲗⲗⲁ ⲧϣⲉⲣⲓ ⲛⲓⲟⲩⲇⲁ ⲙⲡⲉⲥⲉⲣϩⲩⲡⲟⲙⲉⲛⲓⲛ ⲉⲧⲉⲧⲉⲛⲁⲛⲟⲙⲓⲁ .
…
58 ϯⲛⲟⲩ ⲟⲩⲛ ⲁϫⲟⲥ ⲛⲏⲓ ϫⲉⲉⲧⲁⲕⲧⲁϩⲱⲟⲩ ⲉⲩⲥⲁϫⲓ ⲛⲉⲙⲛⲟⲩⲉⲣⲏⲟⲩ ⲛⲑⲱⲛ ⲛⲑⲟϥ ⲇⲉ ⲡⲉϫⲁϥ ϫⲉϧⲁⲣⲁⲧϥ ⲛⲟⲩⲡⲣⲓⲛⲓⲟⲛ .
…
59 ⲡⲉϫⲉ ⲇⲁⲛⲓⲏⲗ ⲛⲁϥ ϫⲉϧⲉⲛⲟⲩⲥⲱⲟⲩⲧⲉⲛ ϩⲱⲕ ⲟⲛ ⲁⲕϫⲉⲙⲉⲑⲛⲟⲩϫ ⲟⲩⲟϩ ⲡⲉⲕⲥⲁⲙⲉⲑⲛⲟⲩϫ ⲉϩⲣⲏⲓ ⲉϫⲉⲛⲧⲉⲕⲁⲫⲉ ϥⲟϩⲓ ⲉⲣⲁⲧϥ ⲛϫⲉⲡⲓⲁⲅⲅⲉⲗⲟⲥ ⲛⲧⲉⲫⲛⲟⲩϯ ⲉⲣⲉϯⲥⲏϥⲓ ⲭⲏ ⲛⲧⲟⲧϥ ⲉϥⲟⲩⲁⲥⲕ ϧⲉⲛⲧⲉⲕⲙⲏϯ ⲟⲩⲟϩ ⲉϥⲉⲧⲁⲕⲉ ⲑⲏⲛⲟⲩ ⲙⲡⲃ .
…
60 ⲁⲥⲱϣ ⲉⲃⲟⲗ ⲛϫⲉϯⲥⲩⲛⲁⲅⲱⲅⲏ ⲧⲏⲣⲥ ϧⲉⲛⲟⲩⲛⲓϣϯ ⲛϧⲣⲱⲟⲩ ⲟⲩⲟϩ ⲁⲩⲥⲙⲟⲩ ⲉⲫⲛⲟⲩϯ ⲫⲏⲉⲑⲛⲟϩⲉⲙ ⲛⲛⲏⲉⲧⲉⲣⲉⲣϩⲉⲗⲡⲓⲥ ⲉⲣⲟϥ .
…
61 ⲟⲩⲟϩ ⲁⲩⲧⲱⲟⲩⲛⲟⲩ ⲉϩⲣⲏⲓ ⲉϫⲉⲛⲡⲓⲡⲣⲉⲥⲃⲩⲧⲉⲣⲟⲥⲃ ϫⲉⲁϥⲧⲁϩⲱⲟⲩ ⲛϫⲉⲇⲁⲛⲓⲏⲗ ⲉⲃⲟⲗϧⲉⲛ ⲣⲱⲟⲩ ϫⲉⲁⲩϫⲉⲙⲉⲑⲛⲟⲩϫ ⲟⲩⲟϩ ⲁⲩⲓⲣⲓ ⲛⲱⲟⲩ ⲕⲁⲧⲁⲫⲣⲏϯ ⲉⲛⲁⲩⲙⲉⲩⲓ ⲉⲉⲣⲡⲉⲧϩⲱⲟⲩ ⲙⲡⲟⲩϣⲫⲏⲣ ⲕⲁⲧⲁⲫⲛⲟⲙⲟⲥ ⲙⲙⲱⲩⲥⲏⲥ .
…
62 ⲟⲩⲟϩ ⲁⲩϧⲟⲑⲃⲟⲩ ⲟⲩⲟϩ ⲁϥⲛⲟϩⲉⲙ ⲛϫⲉⲟⲩⲥⲛⲟϥ ⲛⲁⲧⲛⲟⲃⲓ ϧⲉⲛⲛⲓⲉϩⲟⲟⲩ ⲉⲧⲉⲙⲙⲁⲩ .
…
63 ⲭⲉⲗⲕⲓⲁⲥ ⲇⲉ ⲛⲉⲙⲧⲉϥⲥϩⲓⲙⲓ ⲁⲩⲥⲙⲟⲩ ⲉⲫⲛⲟⲩϯ ⲉⲑⲃⲉⲧⲟⲩϣⲉⲣⲓ ⲥⲟⲩⲥⲁⲛⲛⲁ ⲛⲉⲙⲓⲱⲁⲕⲓⲙ ⲡⲉⲥϩⲁⲓ ⲛⲉⲙⲛⲉⲥⲥⲩⲅⲅⲉⲛⲏⲥ ⲧⲏⲣⲟⲩ ϫⲉⲙⲡⲟⲩϫⲉⲙ ⲟⲩϩⲱⲃ ⲉϥϣⲏϣ ⲉⲛⲉϩ ϧⲁⲥⲟⲩⲥⲁⲛⲛⲁ ⲉϥϭⲓ ⲉϧⲟⲩⲛ ⲉⲣⲟⲥ .
…
64 ⲇⲁⲛⲓⲏⲗ ⲇⲉ ⲁϥⲉⲣ ⲟⲩⲛⲓϣϯ ⲙⲡⲉⲙⲑⲟ ⲙⲡⲓⲗⲁⲟⲥ ⲓⲥϫⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲛⲉⲙⲙⲉⲛⲉⲛⲥⲱϥ .
…
65 ⲟⲩⲟϩ ⲡⲟⲩⲣⲟ ⲁⲥⲧⲓⲁⲕⲏⲥ ⲁⲩⲭⲁϥ ϧⲁⲧⲉⲛⲛⲉϥⲓⲟϯ ⲟⲩⲟϩ ⲕⲩⲣⲟⲥ ⲡⲓⲡⲉⲣⲥⲓⲥ ⲁϥϭⲓ ⲛϯⲙⲉⲧⲟⲩⲣⲟ .
…