1 ⲟⲩⲟϩ ϧⲉⲛⲡⲓⲥⲏⲟⲩ ⲉⲧⲉⲙⲙⲁⲩ ⲉϥⲉⲧⲱⲛϥ ⲛϫⲉⲙⲓⲭⲁⲏⲗ ⲡⲓⲁⲣⲭⲱⲛ ⲡⲓⲛⲓϣϯ ⲫⲏⲉⲧⲟϩⲓ ⲉⲣⲁⲧϥ ⲉϫⲉⲛⲛⲉⲛϣⲏⲣⲓ ⲙⲡⲉⲕⲗⲁⲟⲥ ⲉϥⲉϣⲱⲡⲓ ⲛϫⲉⲟⲩⲥⲏⲟⲩ ⲛϩⲟϫϩⲉϫ ⲫⲁⲓ ⲉⲧⲉⲙⲡⲉ ⲟⲩⲟⲛ ϣⲱⲡⲓ ⲙⲡⲉϥⲣⲏϯ ⲉⲛⲉϩ ⲓⲥϫⲉⲛ ⲉⲧⲁ ⲉⲑⲛⲟⲥ ϣⲱⲡⲓ ϩⲓϫⲉⲛⲡⲕⲁϩⲓ ϣⲁⲉϧⲟⲩⲛ ⲉⲡⲓⲥⲏⲟⲩ ⲉⲧⲉⲙⲙⲁⲩ ⲟⲩⲟϩ ϧⲉⲛⲡⲓⲥⲏⲟⲩ ⲉⲧⲉⲙⲙⲁⲩ ⲟⲩⲟⲛ ⲛⲓⲃⲉⲛ ⲉⲧⲟⲩⲛⲁϫⲉⲙϥ ϧⲉⲛⲡⲉⲕⲗⲁⲟⲥ ⲉϥⲉⲥϧⲏⲟⲩⲧ ϩⲓⲡⲓϫⲱⲙ .
…
2 ⲟⲩⲙⲏϣ ⲛⲧⲉⲛⲏⲉⲧⲉⲩⲉⲛⲕⲟⲧ ⲉⲡⲕⲁϩⲓ ⲉⲩⲉⲧⲱⲟⲩⲛⲟⲩ ⲟⲩⲟϩ ⲛⲁⲓ ⲉⲩⲉⲱⲛϧ ϣⲁⲉⲛⲉϩ ⲟⲩⲟϩ ⲛⲓⲕⲉⲭⲱⲟⲩⲛⲓ ⲉⲩϣⲱϣ ⲛⲉⲙⲟⲩϣⲓⲡⲓ ⲛⲉⲛⲉϩ .
…
3 ⲟⲩⲟϩ ⲛⲏⲉⲧⲕⲁϯ ⲉⲩⲉⲫⲓⲣⲓ ⲙⲫⲣⲏϯ ⲙⲡⲓⲟⲩⲱⲓⲛⲓ ⲛⲧⲉⲡⲓⲥⲧⲉⲣⲉⲱⲙⲁ ⲉⲃⲟⲗϧⲉⲛ ⲛⲓⲙⲏϣ ⲛⲧⲙⲏⲓ ⲙⲫⲣⲏϯ ⲛⲛⲓⲥⲓⲟⲩ ϣⲁⲉⲛⲉϩ ⲟⲩⲟϩ ⲉⲧⲓ .
…
4 ⲟⲩⲟϩ ⲛⲑⲟⲕ ⲇⲁⲛⲓⲏⲗ ⲧⲱⲃ ⲛⲛⲓⲥⲁϫⲓ ⲟⲩⲟϩ ⲁⲣⲓⲥⲫⲣⲁⲅⲓⲍⲓⲛ ⲙⲡⲓϫⲱⲙ ϣⲁⲡⲥⲏⲟⲩ ⲛϯⲥⲩⲛⲧⲉⲗⲓⲁ ϣⲁⲛⲧⲟⲩϭⲓⲥⲃⲱ ⲛϫⲉϩⲁⲛⲙⲏϣ ⲟⲩⲟϩ ⲛⲧⲉⲥⲁϣⲁⲓ ⲛϫⲉϯⲅⲛⲱⲥⲓⲥ .
…
5 ⲁⲛⲟⲕ ⲇⲁⲛⲓⲏⲗ ⲁⲓⲛⲁⲩ ϩⲏⲡⲡⲉ ⲓⲥ ⲃ ⲉⲩⲟϩⲓ ⲉⲣⲁⲧⲟⲩⲟⲩⲁⲓ ⲥⲁⲙⲛⲁⲓ ⲛⲛⲉⲛⲥⲫⲟⲧⲟⲩ ⲙⲫⲓⲁⲣⲟ ⲕⲉⲟⲩⲁⲓ ⲥⲁⲙⲛⲁⲓ ⲛⲛⲉⲛⲥⲫⲟⲧⲟⲩ ⲙⲫⲓⲁⲣⲟ .
…
6 ⲡⲉϫⲏⲓ ⲙⲡⲓⲣⲱⲙⲓ ⲫⲏⲉⲧⲉ ⲡⲓⲃⲁⲇⲇⲓⲛ ⲧⲟⲓ ϩⲓⲱⲧϥ ⲫⲏⲉⲛⲁϥⲭⲏ ϩⲓϫⲉⲛⲛⲓⲙⲱⲟⲩ ⲛⲧⲉⲫⲓⲁⲣⲟ ϫⲉϣⲁⲧⲛⲁⲩ ⲡⲉ ⲡϫⲱⲕ ⲛⲧⲉⲛⲁⲓϣⲫⲏⲣⲓ ⲉⲧⲁⲕϫⲟⲧⲟⲩ .
…
7 ⲟⲩⲟϩ ⲁⲓⲥⲱⲧⲉⲙ ⲉⲡⲓⲣⲱⲙⲓ ⲫⲏⲉⲧⲉ ⲡⲓⲃⲁⲇⲇⲓⲛ ⲧⲟⲓ ϩⲓⲱⲧϥ ⲫⲏⲉⲧϩⲓϫⲉⲛ ⲛⲓⲙⲱⲟⲩ ⲛⲧⲉⲫⲓⲁⲣⲟ ⲁϥϭⲓⲥⲓ ⲛⲧⲉϥⲟⲩⲓⲛⲁⲙ ⲛⲉⲙⲧⲉϥϫⲁϭⲏ ⲉϩⲣⲏⲓ ⲉⲧⲫⲉ ⲁϥⲱⲣⲕ ⲙⲫⲏⲉⲧⲟⲛϧ ϣⲁⲉⲛⲉϩ ϫⲉϣⲁⲟⲩⲥⲏⲟⲩ ⲛⲉⲙϩⲁⲛⲥⲏⲟⲩ ⲛⲉⲙⲧⲫⲁϣⲓ ⲛⲟⲩⲥⲏⲟⲩ ϧⲉⲛⲡϫⲓⲛⲑⲣⲉϥϫⲱⲕ ⲉⲃⲟⲗ ⲛϫⲉⲟⲩϫⲱⲣ ⲉⲃⲟⲗ ⲛⲧⲉⲟⲩϫⲓϫ ⲛⲧⲉⲟⲩⲗⲁⲟⲥ ⲉϥⲧⲟⲩⲃⲏⲟⲩⲧ ⲥⲉⲛⲁⲉⲙⲓ ⲉⲛⲁⲓ ⲧⲏⲣⲟⲩ .
…
8 ⲁⲛⲟⲕ ⲁⲓⲥⲱⲧⲉⲙ ⲟⲩⲟϩ ⲁⲓⲕⲁϯ ⲡⲉϫⲏⲓ ϫⲉⲡⲁϭⲥ ⲟⲩ ⲛⲉ ⲛⲓϧⲁⲉⲩ ⲛⲧⲉⲛⲁⲓ .
…
9 ⲡⲉϫⲁϥ ⲛⲏⲓ ⲙⲡⲁⲓⲣⲏϯ ϫⲉⲇⲁⲛⲓⲏⲗ ⲁⲙⲟⲩ ϫⲉⲥⲉⲧⲟⲡ ⲛϫⲉⲛⲓⲥⲁϫⲓ ⲟⲩⲟϩ ⲁⲩⲉⲣⲥⲫⲣⲁⲅⲓⲍⲓⲛ ⲙⲙⲱⲟⲩ ϣⲁⲡϫⲱⲕ ⲛⲟⲩⲥⲩⲛⲧⲉⲗⲓⲁ .
…
10 ⲛⲥⲉⲥⲟⲕⲟⲩ ⲟⲩⲟϩ ⲛⲥⲉⲟⲩⲃⲁϣ ⲟⲩⲟϩ ⲛⲥⲉⲫⲓⲥⲓ ⲛϫⲉϩⲁⲛⲙⲏϣ ⲟⲩⲟϩ ⲛⲥⲉⲉⲣⲙⲉⲧⲁⲛⲟⲓⲛ ⲛϫⲉⲛⲓⲁⲛⲟⲙⲟⲥ ⲟⲩⲟϩ ⲛⲓⲕⲁⲧϩⲏⲧ ⲉⲩⲉⲕⲁϯ ⲉⲃⲟⲗ .
…
11 ϧⲉⲛⲛⲓⲥⲏⲟⲩ ⲛϣⲓⲃϯ ⲛⲧⲉⲟⲩⲉⲛⲧⲉⲗⲉⲭⲓⲥⲙⲟⲥ ⲛⲉⲙⲉⲡϫⲓⲛϯ ⲙⲡⲓⲥⲱϥ ⲛⲧⲉⲡⲓϣⲱϥ ϣⲟⲃ ⲛⲉⲙⲥ ⲛⲉⲙϥ ⲛⲉϩⲟⲟⲩ .
…
12 ⲟⲩⲙⲁⲕⲁⲣⲓⲟⲥ ⲡⲉ ⲫⲏⲉⲑⲛⲁⲁⲙⲟⲛⲓ ⲛⲧⲟⲧϥ ⲟⲩⲟϩ ⲉⲑⲛⲁⲫⲟϩ ⲉϣⲟ ⲛⲉⲙⲧ ⲛⲉⲙⲗⲉ .
…
13 ⲛⲑⲟⲕ ⲁⲙⲟⲩ ⲙⲧⲟⲛ ⲙⲙⲟⲕ ⲉⲧⲓ ⲅⲁⲣ ⲟⲩⲟⲛ ϩⲁⲛⲉϩⲟⲩ ⲉⲡϫⲱⲕ ⲛⲟⲩⲥⲩⲛⲧⲉⲗⲓⲁ ⲟⲩⲟϩ ⲉⲕⲉⲙⲧⲟⲛ ⲙⲙⲟⲕ ⲉⲕⲉⲧⲱⲛⲕ ⲉⲡⲓⲕⲗⲏⲣⲟⲥ ⲉⲩⲥⲩⲛⲧⲉⲗⲓⲁ ⲛⲧⲉϩⲁⲛⲉϩⲟⲟⲩ .
…