1 ⲁⲣϯⲉⲟⲟⲩ ⲙⲡⲛⲟⲩⲧⲉ ⲧⲱⲛⲉ .
…
2 ⲉⲓϣⲁϫⲉ ⲉⲣⲟ ⲛⲧⲟ ⲁⲫⲑⲟⲛⲓⲁ ⲧϣⲉⲉⲣⲉ ⲙⲡⲕⲟⲙⲉⲥ ⲁⲗⲉⲝⲁⲛⲇⲣⲟⲥ ·
…
3 ⲏ ⲁⲣⲧⲁⲓⲉⲡⲙⲁ ⲉⲛⲧⲁⲩⲥⲁⲛⲟⲩϣⲉ ⲛϩⲏⲧϥ ⲕⲁⲧⲁⲡⲛⲟⲩⲧⲉ ⲁⲩⲱ ⲕⲁⲧⲁⲡⲕⲟⲥⲙⲟⲥ , ϩⲛⲛⲟⲩϣⲁϫⲉ ⲙⲛⲛⲟⲩϩⲃⲏⲩⲉ ·
…
4 ⲉⲛⲉⲙⲡⲉⲡⲟⲩϩⲏⲧ ⲧⲁⲕⲟ . ⲛⲉⲣⲁⲥⲱϣⲡⲙⲁ ⲁⲛ ⲉⲧⲉⲛϩⲏⲧϥ .
…
5 ⲏ ⲛⲉⲣⲁⲧϭⲁⲓⲉⲛⲉⲥⲛⲏⲩ ⲉⲧϩⲙⲡⲙⲁ ⲛⲙⲙⲉ ·
…
6 ⲥⲉⲙⲟⲩⲧⲉ ⲙⲉⲛ ⲉⲣⲟ ϩⲙⲡⲟⲩⲣⲁⲛ ϫⲉⲁⲫⲑⲟⲛⲓⲁ ·
…
7 ⲧⲉⲫⲑⲟⲛⲉⲓ ⲇⲉ ⲉⲣⲟ ⲙⲁⲩⲁⲁⲧⲉ ·
…
8 ⲁⲩⲱ ⲧⲉⲟ ⲛⲃⲁⲥⲕⲁⲛⲟⲥ ⲉⲣⲟ ⲙⲙⲓⲛⲙⲙⲟ ·
…
9 ⲉⲣⲟⲩⲱϣ ⲉⲧⲁⲕⲉⲧⲟⲩⲯⲩⲭⲏ ⲉⲧⲉⲙⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲙⲙⲟⲥ ⲁⲛ · ⲁⲩⲱ ⲉⲥⲱⲣⲙ ⲛⲛⲟⲩϩⲓⲥⲉ ⲉⲡϫⲓⲛϫⲏ ·
…
10 ⲉⲃⲟⲗ ϫⲉⲁⲣⲕⲁⲡⲙⲁ ⲙⲡⲥⲁⲧⲁⲛⲁⲥ ⲉϩⲟⲩⲛ ⲉⲣⲟ ⲉⲧⲣⲉϥⲡⲱⲱⲛⲉ ⲙⲡⲟⲩϩⲏⲧ · ⲁⲩⲱ ⲛϥⲥⲣⲙⲣⲱⲙⲉ ⲛⲧϩⲉ ⲛⲛⲓⲉⲥⲟⲟⲩ ⲉⲧⲟ ⲛϩⲟⲟⲗⲉ ·
…
11 ⲧⲁⲑⲏⲧ ⲁⲩⲱ ⲧⲁⲧⲥⲃⲱ ⲉⲧⲉⲙⲛⲥⲃⲱ ⲙⲙⲟⲥ ·
…
12 ⲉⲛⲉⲟⲩⲛⲉⲡⲓⲥⲧⲏⲙⲏ ⲅⲁⲣ ⲙⲙⲟ . ⲕⲁⲛ ⲁⲩⲙⲓϣⲉ ⲛⲙⲙⲉ ⲛⲁⲙⲉ ⲧⲉⲏⲡ ⲉⲕⲁⲣⲱⲙⲉ ⲉⲉⲓⲙⲉ ϫⲉⲉⲧⲉⲧⲛⲟ ⲛⲁϣ ⲛϩⲉ ⲛϩⲟⲩⲛ ⲙⲡⲉⲧⲛⲙⲁ ·
…
13 ⲙⲁⲗⲓⲥⲧⲁ ⲉⲁⲣϫⲟⲟⲩ ⲙⲡⲟⲩⲉⲓⲱⲧ ⲙⲛⲧⲟⲩⲙⲁⲁⲩ , ϫⲉⲁⲩⲙⲓϣⲉ ⲛⲙⲙⲁⲓ · ⲏ ϫⲉⲁⲩϩⲟⲟⲩϣ ⲉⲣⲟⲓ ·
…
14 ⲉⲣϫⲓϭⲟⲗ ⲉⲙⲡⲟⲩⲙⲓϣⲉ ⲛⲙⲙⲉ ⲟⲩⲧⲉ ⲙⲡⲟⲩϩⲟⲟⲩϣ ⲉⲣⲟ ·
…
15 ⲛⲧⲁⲩⲙⲓϣⲉ ⲛⲙⲙⲉ ϫⲉⲁⲩϯ ⲛⲉ ⲟⲩⲉⲡⲓⲥⲧⲏⲙⲏ ϩⲙⲡⲧⲣⲉⲡⲁⲣⲁⲃⲁ ⲛⲧⲉⲛⲧⲟⲗⲏ ⲛⲧⲉϫⲓϩⲛⲟ ⲛⲧⲟⲟⲧⲟⲩ ⲛⲛⲟⲩⲉⲓⲟⲧⲉ ⲟⲩⲉϣ ⲛϣⲓⲛⲉ ·
…
16 ⲛⲧⲁⲣϣⲓⲛⲉ ⲛⲥⲁⲟⲩ ⲉⲣⲉⲣⲭⲣⲉⲓⲁ ⲛⲁϥ · ⲁⲩⲧⲥⲧⲟ ⲉⲃⲟⲗ · ⲏ ⲉⲙⲡⲟⲩⲧⲁⲁϥ ⲛⲉ ·
…
17 ⲉⲣϣⲁⲛϫⲟⲟⲥ ⲙⲡⲟⲩⲉⲓⲱⲧ ⲙⲛⲧⲟⲩⲙⲁⲁⲩ · ⲉⲛⲣϩⲟⲧⲉ ·
…
18 ⲙⲁⲗⲓⲥⲧⲁ ⲉⲣϫⲓϭⲟⲗ ·
…
19 ⲟⲩⲕⲟⲩⲛ ⲧⲉⲟⲩⲱϣ ⲉⲧⲣⲉⲛⲧⲁⲙⲟⲟⲩ ⲉⲛⲟⲩϩⲃⲏⲩⲉ ⲙⲙⲛⲧⲥⲟϭ ⲉⲧⲉⲉⲓⲣⲉ ⲙⲙⲟⲟⲩ · ⲙⲛⲛⲟⲩϫⲓⲟⲩⲉ ⲙⲛⲛⲟⲩϯⲧⲱⲛ ·
…
20 ⲧⲃⲗⲗⲏ ⲛⲁⲙⲉ ⲉⲧϫⲟⲡϫⲡ ⲙⲙⲉⲉⲣⲉ ⲛⲧϩⲉ ⲛⲛⲉⲧϩⲛⲧⲡⲁϣⲉ ⲛⲧⲉⲩϣⲏ · ⲁⲩⲱ ⲛⲧϩⲉ ⲛⲛⲓⲃⲗⲗⲉ , ⲉⲧⲉⲙⲛⲃⲁⲗ ⲙⲙⲟⲟⲩ ·
…
21 ⲉⲃⲟⲗ ⲧⲱⲛ ϫⲉⲉⲣⲉⲛⲟⲩⲉⲓⲟⲧⲉ ⲛⲃⲟⲗ ϩⲙⲡⲕⲟⲥⲙⲟⲥ ⲛⲁⲥⲱⲧⲙ ⲉⲡⲟⲩϣⲁϫⲉ ⲛϩⲟⲩⲛ ϩⲙⲡⲉⲓⲙⲁ · ⲛⲧⲛⲧⲙⲉⲓⲙⲉ ⲁⲛⲟⲛ ϩⲛⲧϩⲉⲛⲉⲉⲧⲏ ·
…
22 ⲡⲉ ⲁⲩϫⲓⲧⲉ ⲛϭⲟⲛⲥ ⲛⲁⲙⲉ ⲏ ⲁⲩⲑⲙⲕⲟ ⲏ ⲁⲩⲗⲩⲡⲉⲓ ⲙⲙⲟ ·
…
23 ⲛⲉⲣⲉⲏⲡ ⲡⲉ ⲉⲧⲁⲙⲟⲛ ⲉⲡⲟⲩⲙⲕⲁϩ ·
…
24 ⲧⲁⲣⲛⲉⲓⲙⲉ ϫⲉⲉⲣⲉϫⲉⲙⲉ · ϫⲛ ⲙⲙⲟⲛ ·
…
25 ⲏ ⲛⲧⲉⲧⲁⲙⲉⲧⲟⲩⲙⲁⲁⲩ ⲉⲧϩⲙⲡⲙⲁ ϩⲁⲧⲏ . ⲉϣⲱⲡⲉ ⲉⲣⲉⲙⲟⲩⲧⲉ ⲉⲣⲟⲥ ⲁⲛ ⲙⲙⲁⲧⲉ ϩⲛⲧⲟⲩⲧⲁⲡⲣⲟ ϫⲉⲙⲁⲁⲩ .
…
26 ⲉⲣⲉⲡⲟⲩϩⲏⲧ ⲇⲉ ⲟⲩⲏⲩ ⲛⲥⲁⲃⲟⲗ ⲙⲙⲟⲥ .
…
27 ⲛⲧϩⲉ ⲉⲧⲥⲏϩ ϫⲉⲡⲉⲓⲗⲁⲟⲥ ⲧⲁⲓⲟ ⲙⲙⲟⲓ ϩⲛⲛⲉⲩⲥⲡⲟⲧⲟⲩ · ⲡⲉⲩϩⲏⲧ ⲇⲉ ⲟⲩⲏⲩ ⲛⲥⲁⲛⲃⲟⲗ ⲙⲙⲟⲓ ·
…
28 ⲉⲛⲉⲙⲡⲉⲡⲟⲩϩⲏⲧ ⲅⲁⲣ ⲛⲁⲧⲥⲃⲱ ⲣⲕⲁⲕⲉ ⲉⲣⲟ . ⲛⲉⲣⲁⲕⲁⲧⲁⲫⲣⲟⲛⲉⲓ ⲡⲉ ⲛⲛⲟⲩⲉⲓⲟⲧⲉ ⲉⲧϩⲛⲧⲥⲩⲛⲁⲅⲱⲅⲏ ⲛⲙⲙⲉ · ⲏ ⲛⲉⲣⲁⲥⲱϣ ⲛⲛⲉⲥⲛⲏⲩ , ⲉⲧⲉⲣⲉⲟⲩⲏϩ ⲛⲙⲙⲁⲩ ϩⲛⲧⲟⲩⲙⲛⲧϫⲁⲥⲓϩⲏⲧ · ⲙⲛⲧⲟⲩⲙⲛⲧⲃⲁⲃⲉⲣⲱⲙⲉ ·
…
29 ⲏ ⲉⲛⲉⲙⲡⲉⲕⲱ ⲛⲥⲱ ⲛⲧⲉⲥⲃⲱ ⲙⲛⲧⲙⲛⲧⲣⲙⲛϩⲏⲧ . ⲁⲩⲱ ⲛⲧⲉⲙⲉⲣⲉⲡⲡⲉⲧϩⲟⲟⲩ , ⲉϩⲟⲩⲉⲡⲡⲉⲧⲛⲁⲛⲟⲩϥ . ⲛⲉⲣⲁⲙⲉⲗⲉⲧⲁ ⲡⲉ ⲛϩⲉⲛϣⲁϫⲉ ⲉⲩⲃⲟⲟⲛⲉ . ⲛⲧⲉϫⲟⲟⲥ ϩⲛⲧⲟⲩⲧⲁⲡⲣⲟ ⲉⲧⲙⲉϩ ⲛⲥⲁϩⲟⲩ ϩⲓⲥⲓϣⲉ , ϫⲉϯⲛⲁⲃⲱⲕ ⲉⲕⲉϩⲉⲛⲉⲉⲧⲏ .
…
30 ⲛⲧⲁⲡⲉⲓⲙⲁ ϫⲓⲧⲉ ⲛϭⲟⲛⲥ ϩⲛⲟⲩ ·
…
31 ⲏ ⲟⲩ ⲡⲉ ⲡⲃⲁⲣⲟⲥ ⲉⲛⲧⲁⲩⲟⲩⲁϩϥ ⲉϫⲱ · ⲛⲥⲁⲃⲏⲗ ϫⲉⲁⲩϫⲟⲟⲥ ⲛⲉ ϫⲉⲙⲡⲣⲡⲁⲣⲁⲃⲁ ⲛⲧⲉⲛⲧⲟⲗⲏ ⲙⲡⲛⲟⲩⲧⲉ · ⲉⲃⲟⲗ ϫⲉⲁⲣϯϣⲟⲟⲩ , ⲁⲩⲱ ⲙⲉⲥⲟⲩⲁⲫⲓ ⲛⲟⲩⲗⲉⲗⲟⲩ ⲉⲥϩⲙⲡⲏⲓ ⲛⲙⲙⲉ ϫⲉⲕⲁⲥ ⲉⲧⲉⲧⲛⲛⲁϣⲱⲡⲉ ⲛϫⲣⲟⲡ ⲁⲩⲱ ⲛⲥⲕⲁⲛⲇⲁⲗⲟⲛ ⲛⲛⲉⲧⲛⲉⲣⲏⲩ ·
…
32 ⲉⲧⲃⲉⲡⲁⲓ ϯϩⲟⲙⲟⲗⲟⲅⲉⲓ ⲛⲉ ϫⲉⲉϣⲱⲡⲉ ⲉⲣⲉⲧⲙⲕⲁⲉⲡⲓⲥⲧⲏⲙⲏ ⲙⲙⲟ ⲁⲩⲱ ⲛⲧⲉϥⲓ ⲧⲉⲓⲙⲛⲧⲁⲧⲥⲱⲧⲙ ⲉⲃⲟⲗ ⲙⲙⲟ ⲙⲛⲛⲓϯⲧⲱⲛ ⲉⲡϫⲓⲛϫⲏ . ϯⲛⲁⲧⲣⲉⲡⲟⲩϩⲏⲧ ⲙⲕⲁϩ . ⲁⲩⲱ ϯⲛⲁⲧⲣⲉⲩⲉⲓⲣⲉ ⲛⲉ ⲕⲁⲧⲁⲡⲉⲛⲧⲁϥⲉⲓ ⲉⲃⲟⲗ ϩⲛⲧⲟⲩⲧⲁⲡⲣⲟ ·
…
33 ⲛⲁⲙⲉ ϯⲙⲟⲕϩ ⲛϩⲏⲧ ⲛⲁⲓ , ⲛⲙⲙⲉ , ⲏ ⲛⲙⲙⲏⲧⲛ ·
…
34 ⲉⲓⲣϩⲟⲧⲉ ϫⲉⲙⲏⲡⲟⲧⲉ ⲛⲧϩⲉ ⲉⲛⲧⲁⲡϩⲟϥ ⲉⲝⲁⲡⲁⲧⲁ ⲛⲉⲩϩⲁ ϩⲛⲧⲉϥⲡⲁⲛⲟⲩⲣⲅⲓⲁ ⲛⲥⲉⲧⲁⲕⲟ ⲛϭⲓⲛⲉⲧⲛϩⲏⲧ ⲉⲃⲟⲗ ϩⲛⲧⲙⲛⲧϩⲁⲡⲗⲟⲩⲥ ⲙⲛⲡⲧⲃⲃⲟ ⲉⲧϫⲓ ⲉϩⲟⲩⲛ ⲉⲡⲉⲭⲣⲓⲥⲧⲟⲥ :
…
35 ⲉϣϫⲉ ⲧⲉⲧⲙⲙⲁⲩ ⲙⲡϥⲕⲁⲁⲥ ϩⲙⲡⲡⲁⲣⲁⲇⲉⲓⲥⲟⲥ ⲉϥⲛⲁϯⲥⲟ ⲉⲣⲟ . ⲏ ⲉⲣⲱⲧⲛ ϩⲙⲡⲧⲣⲉⲧⲛⲕⲁⲙⲁ ⲛⲁϥ ⲛϩⲏⲧⲧⲏⲩⲧⲛ · ⲁⲩⲱ ⲛⲧⲉⲧⲛϣⲱⲡ ⲉⲣⲱⲧⲛ ⲛⲛⲉϥϣⲟϫⲛⲉ ⲛⲕⲣⲟϥ ⲙⲛⲛⲉϥϩⲃⲏⲩⲉ ⲙⲡⲟⲛⲏⲣⲟⲛ ·
…
36 ⲛϥⲛⲁϣϭⲙϭⲟⲙ ⲅⲁⲣ ⲁⲛ ⲉⲛⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ . ⲛⲁⲓ ⲉⲧⲉⲣⲉⲡⲉⲭⲣⲓⲥⲧⲟⲥ ϣⲟⲟⲡ ⲛⲁⲩ ⲛⲃⲟⲏⲑⲟⲥ ⲁⲩⲱ ⲛⲥⲕⲉⲡⲁⲥⲧⲏⲥ ·
…
37 ⲛⲧϩⲉ ⲉⲧⲥⲏϩ ϫⲉⲡⲉⲧⲙⲓϣⲉ ⲉϫⲱⲕ ⲡⲉ ⲡⲉⲕⲃⲟⲏⲑⲟⲥ , ⲁⲩⲱ ⲧⲥⲏϥⲉ ⲡⲉ ⲙⲡⲉⲕϣⲟⲩϣⲟⲩ ⲁⲩⲱ ⲡⲉⲟⲟⲩ ⲙⲡⲉⲥⲧⲉⲣⲉⲱⲙⲁ ·
…
38 ⲡⲉⲧⲛⲁⲙⲉⲣⲉⲡⲡⲉⲧϩⲟⲟⲩ , ⲛⲧⲟϥ ⲡⲉⲧⲛⲁⲧⲁⲕⲟ ·
…
39 ⲁⲩⲱ ⲛⲧⲟϥ ⲡⲉⲧⲉⲣⲉⲡⲇⲓⲁⲃⲟⲗⲟⲥ ⲛⲁϭⲙϭⲟⲙ ⲉⲣⲟϥ ϩⲛⲛⲉϥϩⲃⲏⲩⲉ ⲙⲙⲛⲧⲣⲉϥϩⲉⲧⲃⲯⲩⲭⲏ ·
…
40 ⲡⲥⲟⲫⲟⲥ ⲇⲉ ⲛⲧⲟϥ ⲉⲧⲙⲉ ⲛⲧⲉⲥⲃⲱ . ϥⲛⲁϣⲱⲡ ⲉⲣⲟϥ ⲛⲧⲉⲛⲧⲟⲗⲏ ·
…
41 ⲁⲩⲱ ⲡⲣⲙⲛϩⲏⲧ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ · ⲛⲁϫⲡⲟ ⲛⲁϥ ⲛⲟⲩⲣϩⲙⲙⲉ ·
…
42 ⲡⲗⲏⲛ ⲙⲁⲣⲓⲥⲱⲧⲙ ϫⲉⲁⲣϯⲙⲧⲟⲛ ⲛⲛⲟⲩⲉⲓⲟⲧⲉ ⲉⲧϩⲙⲡⲙⲁ ⲛⲙⲙⲉ . ⲁⲩⲱ ⲛⲧⲉⲥⲱⲧⲙ ⲛⲥⲱⲟⲩ ϩⲛϩⲱⲃ ⲛⲓⲙ ·
…
43 ⲧⲁⲣⲉⲡⲉⲛϩⲏⲧ ⲙⲧⲟⲛ ·
…
44 ⲁⲩⲱ ⲛⲧⲟ ϩⲱⲱⲧⲉ ⲛⲧⲉⲥⲉⲓ ⲙⲡⲟⲩⲧⲱⲧ ⲛϩⲏⲧ ·
…
45 ⲉϣⲱⲡⲉ ⲇⲉ ⲟⲛ · ⲉⲟⲩⲛⲧⲉ ⲟⲩϣⲁϫⲉ ⲉϫⲟⲟϥ . ⲉⲓⲥ ⲛϩⲗⲗⲟⲓ ⲛⲉⲛⲉⲓⲟⲧⲉ ⲁⲩⲱ ⲛⲉⲛⲥⲛⲏⲩ ⲁⲩⲉⲓ ϣⲁⲣⲱⲧⲛ ·
…
46 ⲧⲁⲩⲟⲩⲟϥ ⲉⲣⲟⲟⲩ · ⲁⲩⲱ ⲛⲧⲱⲧⲛ ⲧⲏⲣⲧⲛ ·
…
47 ⲡⲉ ⲟⲩⲛⲧⲏⲧⲛ ϣⲁϫⲉ ⲙⲙⲁⲩ ⲏ ⲗⲁⲁⲩ ⲛϩⲱⲃ · ϩⲙⲡⲉⲧⲛⲙⲁ ·
…
48 ⲙⲡⲣϭⲱ ⲛⲟⲩⲉϣ ⲛⲧⲁⲙⲟⲟⲩ ⲛⲧⲉⲧⲛⲧⲙϩⲉⲡⲗⲁⲁⲩ ⲛϩⲱⲃ ⲉⲣⲟⲟⲩ · ϫⲉⲕⲁⲥ ⲉⲣⲉⲡⲉⲛϩⲏⲧ ⲛⲁⲙⲧⲟⲛ ⲧⲏⲣⲛ ϩⲓⲟⲩⲥⲟⲡ ⲁⲛⲟⲛ ⲁⲩⲱ ⲛⲧⲱⲧⲛ ·
…
49 ⲁⲩⲱ ⲟⲛ ⲛⲧⲉⲡϫⲟⲉⲓⲥ ⲧⲱⲧ ⲛϩⲏⲧ ⲉϫⲱⲛ :
…